Bachelor in Policing ICUC International B.V.: ICUC INT’L TA UN UNIVERSIDAT SOLIDO, RESPETÁ I KLA PA OFRESÉ E ESTUDIO BACHLOR PA POLIS AFIN KU KÒRSOU TIN UN KUERPO POLISIAL FUERTE I EFEKTIVO
Bachelor in Policing ICUC International B.V.: ICUC INT’L TA UN UNIVERSIDAT SOLIDO, RESPETÁ I KLA PA OFRESÉ E ESTUDIO BACHLOR PA POLIS AFIN KU KÒRSOU TIN UN KUERPO POLISIAL FUERTE I EFEKTIVO
Willemstad 23 di Desèmber 2016- Durante di un konferensha di prensa, e tim di maneho di ICUC International (ICUC Int’l) B.V., Sr. Mr. Carl Camelia, direktor general, Sra. Drs. Jeanine Cozijns-Isenia, direktor di enseñansa i sr. Emilio Ferrero MBA, direktor di Internashonalisashon a duna prensa tokante nan organisashon ICUC Int’i I tokante e Bachelor in Policing.
Breve historia i trayektoria di ICUC Int’l
A lanta ICUC Int’l basá riba e maneho nobo di Ministerio di Desaroyo Ekonómiko di Kòrsou yamá Edukashon Trasnashonal ku tin komo meta pa inová ekonomía di Kòrsou atraves di desaroyá i promové Turismo di Edukashon. Tabata minister Yasser Hakim di MFK kende a bini ku e idea aki na 2010.
A konstituí ICUC Int’l riba 24 di mei 2013, después ku a laga Buro pa Propiedat Intelektual di Kòrsou investigá si tin algún persona o instituto ku tin derechi riba e nòmber i basá riba resultado negativo di e investigashon aki a registrá e nòmber “Intercontinental University of the Caribbean (ICUC)”.
ICUC Int’l for di aña 2013 ta duna lès na e lokalidat di St. Martinus University na Scherpenheuvel. ICUC Int’l a duna kurso di e.o. Kontabilidat pa BAB, Pre-University English pa Latinonan, i varios kurso den Medisina Integrativo ku ta un di e spesialidatnan di ICUC Int’l.
E universidat tin 24 estudio rekonosé ofisialmente pa medio di un Dekreto Ministerial (estudionan di Bachelor) i un Dekreto Nashonal (Landsbesluit) pa esnan na nivel di Master i Doktorado.
Den kuadro di Edukashon Trasnashonal, Sr. Emilio Ferrero ku ta director di internashonalisashon di ICUC Int’l a splika ku nan tin konvenio será kaba ku universidatnan na
Venezuela, Colombia, Paraguay, Bolivia, Madrid, Barcelona i Jamaica. E strategia ta ku ta ofresé estudionan huntu bou di dòbel titulashon, kaminda e studiante mester hasi parti di su estudio na Korsou, en bes di para warda ki dia un studiante ta interesá pa bini Korsou.
Estudio Bachlor pa Polis
E proyekto di Bachelor di Polis a kuminsa na prinsipio di aña 2014 ora ku Minister di Hustisia Sr. Navarro, a puntra Carl Camelia Direktor General di ICUC Int’l kon por a bini ku un programa di entrenamentu ku por drecha funshonamentu di polis di Kòrsou. ICUC Int’l a haña ta importante pa basa e entrenamentu riba investigashon sientifiko. Pa e motibu aki a hasi 4 investigashon: unu ku 31 organisashon di bario, dos grupo di enfoke, unu ku Ministerio Publiko i otro ku Mando Polisial i un enkuesta general bou di 752 habitante di Kòrsou. Loke ku mas a sali na klá for di e investigashon ta ku e polis falta hopi lo ke ta trata aspektonan di su personalidat i di komunikashon.
Basá riba e resultadonan ICUC Int’l a deseñá, huntu ku su eksperto di enseñansa Sra Jeanine Isenia, e estudio di Bachelor in Policing, ku e meta general halsa nivel intelektual i nivel di funshonamentu polisial i asina hasi Kuerpo Polisial un kuerpo di mas prestigio i respèt. Karakeristiko di e estudio ta ku e ta basá riba nos konteksto kultural i ta inkluí un estadia di un semester na Colombia pa e partisipante eksperensiá e trabou polisial pafó di su mes kas pero den un kuerpo ku ta bon entrená i organisá.
E direktor di enseñansa di ICUC Int’l, Sra drs. Jeanine Isenia, a splika ku e enseñansa di e Bachelor pa polis ta basá riba desaroyo di kompetensia. Esaki kier men ku mester entrená un polis pa e tin tur e tres aspektonan ku ta hasi un profeshonal kompetente. Pues e mester tin e konosementu, e mester por apliká e konosementu i e mester tin e aktitut profeshonal nesesario. E kompetensinan aki di e estudio, ICUC Int’l a derivá for di e 7 kompetenshanan ku Kuerpo Polisial MES a determiná komo kompetenshanan profeshonal, o sea kiko un polis mester por, pa e ta un bon polís: esta e mester por analisá i solushoná problema – e mester por komuniká – e mester por hasi su trabou – e mester konosé su entorno – e mester por manehá – e mester tin un bon personalidat – i e mester por komprondé asuntunan komersial.
Aaklará tambe diferente punto di malentendemiento ku ta reina den prensa tokante kon otorgamentu di e estudio di Bachelor di Polis na ICUC Int’l a bai i ku NO tabatin ningún iregularidat.
Ta intenshon pa kuminsa ku e estudio na fin di Yanüari 2017.
