Banco di Caribe ta felisitá e hóbennan ku nan desaroyo artístiko: Final di Luna Yen a resultá un show total!

Banco di Caribe ta felisitá e hóbennan ku nan desaroyo artístiko: Final di Luna Yen a resultá un show total!

WILLEMSTAD- Desèmber- 2016: Resientemente a kulminá e trayekto pa show di talento Luna Yen 2016. Dilanti di un públiko grandi 8 finalista a duna tur ku tin pa konkistá e titulo máksimo. Huradonan pa e anochi final Veanira Booy, Crisen Schorea, MusijeMuis, Reuel Rogers i Richie Rich Pieters tabata tin e tarea difísil pa saka e hóben ku mas a sobresalí. “Ta mashá difísil premia un hóben sabiendo ku tur 8 a hinka hopi energia i pashon den nan presentashon. Loke pa nos ta importante ta nan desaroyo; nos ta tuma nota ku tur aña di nobo por mira hopi adelanto den e formashon artístiko ku nan ta risibí serka e tim di Luna Yen.”, esaki di akuerdo ku Jetha Römer Marketing Manager di Banco di Caribe.

Durante di e anochi final públiko i partisipantenan a disfrutá di presentashon di finalistanan di Gang di Arte di Aruba, MuisjeMuis di Hulanda i Jean Phael ganadó di Luna Yen 2015. Esnan ku a kompetí tabata Swarovski Dancer, Seajea Sambo (Aktuashon), Shersand Wanga (Baile), Natisha Verkerk (Kanto), SC Plus (Baile), Melissa Chacin Blanko (Kanto), Dance Brothers i Big G (Rap). Ta ún ganador por tin, i pa e gran final di Luna Yen a saka Dance Brothers komo ganador apsoluto siguí pa promé finalista Big-G i komo di dos finalista a resultá Seajea Sambo. Segni Bernadina, direktor artístiko a gradisí Banco di Caribe i tur patrosinador pa nan aporte durante 10 aña di Luna Yen. “Lo no tabata posibel sin boso aporte. E kontribushon di un patrosinador ta mesun importante ku esun di un mayor. Ta importante pa komo mayor invertí den desaroyo di kada yu. Un formashon artístiko ta yuda e hóben den diferente aspekto di su bida.”
Banco di Caribe a bin ta sostené Luna Yen pa 8 aña konsekutivo, i a mira hopi hóben desaroyá nan talento riba tarima di Luna Yen. “No ta tur hóben ta desaroyá di mes manera, tin ta tremendo den matemátika, otronan den literatura. Importante ta, pa e hóben risibí un bon formashon den loke ta pèrmití e desaroyá su ful potensial”, asina Jetha Römer a finalisá. Banco di Caribe ta felisitá tur hóben ku durante di tur e añanan a risibí nan formashon artístiko den e show di talento Luna Yen i e ganadornan di e aña aki.

###

Riba foto:
• 0143 / Jihan Hammoud, Banco di Caribe huntu ku ganadónan di Luna Yen.
• 0126 / d.r.p.d Jihan Hammoud di Banco di Caribe, promé finalista di Luna Yen i Jetha Romer Marketing Manager Banco di Caribe.
• 0115/ Jihan Hammoud, Banco di Caribe huntu ku di dos finalista di Luna Yen
• 0023/ Jetha Romer Marketing Manager Banco di Caribe i Segni Bernadina, direktor artístiko Luna Yen.