Frakshon di MFK bou di tur sirkunstansia lo yuda forma QUORUM pa aprobá kredensial Nos no lo stroba e proseso demokrátiko pero hustamente lo yuda evitá kualke ‘dualing’ konstitushonal
Frakshon di MFK bou di tur sirkunstansia lo yuda forma QUORUM pa aprobá kredensial Nos no lo stroba e proseso demokrátiko pero hustamente lo yuda evitá kualke ‘dualing’ konstitushonal
Kòrsou, 22 Desèmber 2016,
Movementu Futuro Kòrsou (MFK), a tuma nota di deklarashon na prensa di formador, ku a base di un skema ku huntu ku presidente i Grefir a wòrdu hinka den otro pa atendé e proseso di remplasá parlamentarionan ku ta huramentá komo minister den e próksimo gabinete nobo.
Un di argumentonan di sr. Gijsbertha ta e aspekto di forma quorum pa asina un reunion públiko por kuminsá i asina trata e kredensialnan di e diferente miembronan nobo di parlamento. MFK kier pa ta bon kla ku nos organisashon no lo stroba e proseso demokrátiko di kana su kaminda.
Aprobashon di kredensialnan di miembronan ta un proseso demokrátiko ku nos di MFK ta respetá i sostené, no tin motibu pa nos pone funshonamentu di nos demokrasia na peliger, dor di no firma e lista di presensia pa asina no yega quorum i asina inisiá un reunion kaminda tin komo punto di agènda aprobashon di kredensial di miembronan nobo pa Staten.
Ademas e dianan ku a transkurí pa un gobièrnu demisionario i miembronan di un gabinete elegí tambe den parlamento por fungi ku dòbel funshon ta hustamente pa asina ku mayoria por a atendé den tur trankilidat e skuifmentu di asientonan, ta lamentabel ku kier tilda nos den parlamento awor ku debí na nos ta hasi un mayoria den parlamento imposibel pa huramentá i atendé ku parlamentarionan nobo den Staten ta drenta.
MFK ta bolbe reiterá ku nos lo forma QUORUM bou di tur sirkunstansia pa aprobá kredensialnan di esnan ku tin drenta nobo den Staten.
Na nòmber di Frakshon di MFK
Gerrit Schotte
Lider di Frakshon
