Prestigioso MCB Prize 2016 otorgá na: NAAM – National Archaeological and Anthropological Memory Management Foundation

December 23, 2016 REDAKSHON

Willemstad –
E aña aki, den kual Maduro & Curiel’s Bank ta selebrá su 100 aniversario, ta e aña tambe ku Bo Banko Amigu ta otorgá pa di 20 biaha e prestigioso MCB Prize.
E premio aki ta wòrdu entregá na e organisashon, persona òf instituto ku na nos humilde opinion a sobresalí i/òf a hasi un impakto positivo den nos komunidat.

MCB Prize 2016 ta keda otorgá na un instituto ku pa hopi aña a sa di mantené nos herensia kultural i artefaktonan pa asina ofresé nos komunidat e oportunidat di apresiá esaki, tantu material komo inmaterial. Un organisashon ku ta dediká su mes na investigashon, dokumentashon, preservá nos tradishonnan i kustumbernan di historia general di nos nashon, pa konsientisá nos komunidat i ku e propósito pa eduká i enrikesé.

Ademas di e bon trabou ku e organisashon aki a bin ta desplegá, hustamente e aña aki ku nos Banko ta kumpli 100 aña, e instituto aki a habri un eksibishon ku ta ilustrá 100 aña di nos refineria na Kòrsou. E eksposishon aki ta mustra e impakto enorme di e refineria den nos bida durante último 100 añanan. Ta bon pa nos suprayá ku e idea inisial pa habri un banko 100 aña pasá tabata debí na e aktividatnan di negoshi relashoná ku establesimentu di refineria riba nos isla. Esaki ta nifiká ku nos tambe ta orguyoso di ta forma parti di e historia riku ei.

Pa e motibunan ariba menshoná, MCB Prize 2016 e aña aki ta bai pa e prestigioso organisashon: National Archaeological and Anthropological Memory Management Foundation mihó konosí komo: NAAM.

Pa nos ta un plaser i honor di por otorgá MCB Prize 2016 na e instituto aki ku tin netamente na su enkargo preservashon di historia awor i pa hopi generashon mas.

Pa duna un poko mas informashon di NAAM:
Gobièrnu Sentral di Antia Hulandes a fundá NAAM na aña 1998.
NAAM ta mas ku solamente un museo i den kurso di tempu NAAM a desaroyá den un instituto ku ta elaborá ampliamente riba dokumentashon, restorashon i enrikesimentu di nos memoria kolektivo. Pa e motibu ei for di 2008 e lèter M den NAAM su nòmber no ta para mas pa “Museum” (museo) pero pa “Memory Management” (Maneho di memoria).
NAAM ta un bentana di informashon tokante herensia den tur sorto di forma. Pa artefaktonan di tempu antiguo i di tempu mas resien, pero tambe pa herensia intangibel, manera músika, fishi di ántes i estilo di bida. Banda di esaki NAAM ta punto di kontakto i sentro di informashon pa dos konbenio: Konbenio di Malta ku
ta regulá protekshon di patrimonio arkeológiko i e Konvenio pa Salbaguardiá Herensia Intangibel. Di e manera aki NAAM ta yuda sostené un maneho integrá di herensia.

Pa bini bèk riba e Eksposishon di NAAM den kual ta pone atenshon na 100 aña di nos refineria na Kòrsou, esaki ta un di e motibunan prinsipal pa kual MCB Prize 2016 ta keda otorgá na e instituto akí.

Un eksposishon ku sin duda meresé pa mas tantu hende posibel, tantu mucha komo hende grandi, por bishitá.

E eksposishon ilustrá pa hopi imágen, además di ta revelá historia di nos refineria, tambe ta ilustrá bida sosial, ekonómiko, kultural, artístiko i di deporte durante último 100 aña. E eksposishon ta asina grandi ku ela keda repartí den diferente sekshon:
Kòrsou promé ku 1915; historia di Shell te na e temporada di disturbionan di 1969;
E periodo di transishon di 1969 pa 1985; i e temporada di 1985 te awe, ku ta e periodo ku PEDEVESA ta manehando nos refineria.
Ademas di tene kuenta ku pasado, tambe tin un área ku ta trata e futuro di refineria despues di 2019, ilustrando e aspektonan positivo di refineria pa Kòrsou, pero tambe e efektonan ku esaki tin riba nos medio ambiente.

E eksposishon 100 aña di Refineria na Kòrsou ta den edifisio di NAAM na Johan van Walbeeckplein # 13 (ántes Biblioteka Públiko na Pietermaai).
E eksposishon ta habrí di djamars pa djabièrnè di 8:00 AM – 5:00 PM; Djasabra i Djadumingu di 10:00 AM – 4:00 PM. Por gosa di e eksposishon te yüli 2017.

Ku esaki Maduro & Curiel’s Bank ta yama NAAM MASHA DANKI pa e trabou ekstraordinario aki, i ta invitá Kòrsou kompletu pa por fabor tuma un ratu pa bishitá e eksposishon aki ku bo famia. Ta un manera fenomenal pa nos enrikesé nos mes, spesialmente den e temporada aki di fin di aña.

Riba potret momento ku sr. Richinel Ansano direktor di NAAM, huntu ku
sra. Amy Victorina, sra. Lida Pandt i sr. Marlon Reina ta tuma e Premio ‘MCB Prize 2016‘ serka sr. Chicu Capriles i sra. Ruthsella Jansen di MCB.

Kòrsou 22 di desèmber 2016.
mcbprijs_06