KOMUNIKADO POLISIAL ARUBA 5 YANÜARI 2017

AKSIDENTÁ I KORE BAI.

Durante patruyahe den sentro di siudat, un hòmber a aserká patruya i a identifiká su mes komo R.
El a deklará ku djis un ratu promé, un Chevrolet Tahou, kolor di oro, numerá A-1280, lo a dal kontra su outo ku tabata stashoná i a kore bai.
R ta sigui deklará ku e outo ta pertenesé na un amigu di dje i ku lo e papia ku e amigu i ku kisas e mes lo laga drecha e outo.
E outo di R, un Suzuki Alto, numerá A 33523, ku tabata stashoná, tabatin dano na e porta robes parti patras.
Polisnan a kontrolá den sentro di siudat i bisendario, pero no a topa ku dicho Chevrolet.
WCDT a wòrdu poné na altura di e kaso.
=======================

VIOLASHON DI ORARIO DI SERA.

Durante patruyahe,na altura di South Beach Lounge, polisnan a ripará ku e klúp nokturno ainda tabata habrí.
Anto e momentu ey, ya tabata 01:40.
E D.J “One o One”, tabata tokando na volumen abou.
Tur e dos barnan ainda tabata habrí. 
Tabatin hopi hende na e sitio.
E doño, e hòmber B, a wòrdu mustrà riba e hecho ku e ta violando orario di sera.

CP a keda poné na altura di e kaso.
=======================

      KIEBRO DEN OUTO.

E hòmber PD a yega na warda di polis, deklarando ku un pèrsona lo a kibra su outo, un Nissa Fuga, numerá A-57025.
PD a sigui deklará ku el a stashoná su outo patras di Black & White bar.
Ora e tabata kanando bai el a skucha un sonido duru.
El a bira bai bèk na su outo i a mira un mucha hòmber kolor skur ku “dreadlocks” kortiku pará na su outo.
E mucha hòmber tabatin un karson kòrtiku bistí, slòf di e marka Addidas i un kapuchón pretu.
Ora e mucha hòmber a mir’é, el a baha e kapuchón riba su kara i a kore bai direkshon Village.
PD a persiguí e mucha hòmber, pero el a pèrdè den Village.

E mucha hòmber a kibra e bentana parti dilanti na banda drechi ku un blòki di betòn.
El a bai ku 3 oloshi; un di marka Guess, di oro, na un balor di 500 florin Arubano; un di marka  Swiss Army, di plata na un balor di 2000 florin Arubano i un oloshi ku PD a haña  di regalo.
A tuma e deklarashon.
Forencis tambe a yega na e sitio pa saka potrèt i traha nan rapòrt.
=======================

VIOLASHON DI ORARIO DI SERA.

Durante patruyahe, na altura di Olde Molen, polisnan a skucha músika duru i nan a mira hopi hende sintá riba terás, siendo ku e lokalidat mester a sera for di 03:00.
Pa banda di 03:25, mientras ku polisnan tabata wardando pa tur hende bandoná e lokalidat, nan a nota ku 2 porta parti abou di e molen a habri i hopi hende a sali afó.
E hendenan a keda sintá gewón riba e terás.
Pa banda di 03:40, polisnan mes mester a subi e tereno pa desalohá tur hende.
CP a wòrdu poné na altura di e kaso.
=======================

       INTERMEDIASHON

Riba 5 di yanüari, SCP a dirigí patruya di Nort pa un kaso di hopi urgensia en konekshon di un hòmber agresivo.
Na e sitio polisnan a wòrdu aserká dor di  esnan enkargá ku seguridat.
Esakinan a deklará ku un hòmber lo a yega eynan pa tratamentu médiko i ku e tabata hopi agresivo.
E hòmber lo a maltratá un di e miembronan di seguridat durante e proseso.
E hòmber a wòrdu tené na un manera táktiko riba e kama.
Ta trata di e hòmber K, ku probablemente tin problema síkiko.
K a wòrdu tratá dor di un sikiatra i hibá na PAAZ pa mas tratamentu.
Polisnan a papia ku e hòmber B, kende a deklará ku K a bolbe bira agresivo i a bolbe kòrta su brasa robes.
B ta sigui bisa ku djaluna K lo mester a bai Hulanda.
A pone SCP na altura dje kaso.
=======================

                  ROBO

CP a dirigí patruya na sentro di siudat na altura di Baranca Bar, kaminda lo mester tabata maltratando un hòmber.
Na e sitio polisnan a topa ku un grupo di pèrsona i un hòmber ku a aserká patruya.
E hòmber di nòmber R aki tabata sangra na frenta, nèt meimei di su wowonan.
E tabatin un kap chikitu meimei di su wowonan.
Un testigu a aserká polis i a deklará ku el a mira kon 3 hòmber deskonosí p’e tabata maltratá R.
Un di e 3 hòmbernan aki a maltrat’é ku un bòter.
Despues nan 3 lo a drenta un outo blanku ku tabata parse Nissan Sedan di 4 porta  i a kore bai den direkshon wèst.
R a keda drumí na suela i ku 2 hòmber ku e testigu  konosé komo J i T a bai serka R.
El a mira kon nan a kohe un telefòn selular for di R.
E ta sigui deklará ku tambe nan lo a kohe un biyete di 10 florin Arubano i tambe otro biyete di 10 dòlar merikano for di R.
A pidi presensia di ambulans pa por duna R tratamentu médiko.
R tabata fuertemente bou di influensia di alkohòl i a konseh’é pa sosegá i pa mainta e bai hasi denunsia na Rechèrche
R ta biba den eksterior (Estados Unídos) i tabata temporalmente riba Aruba serka su tata.
R a deklará na polis ku ta e próksimo djasabra lo e  regresá.
Tambe el a sigui bisa ku su telefòn selular ta pretu di e marka ZTE.

Komandante na warda i CP a wòrdu poné na altura di e kaso.
=======================

             KACHÓ LÒS

SCP a dirigí patruya na Jaburibari, kaminda probablemente un kachó di bisiña tabata riba tereno di e adrès ariba menshoná.
Na e sitio, polisnan a papia ku e hòmber di nòmber G.
El a deklará ku ya ta bai 4 anochi ku e kachó aki ta bula kurá i subi su tereno.
E kachó tin hopi karpata i a kuminsa bira un molèster pa G.
A puntra G si e ta duna e kacho kuminda i el a ninga esaki.
A kore ku e kachó for di riba e tereno.
Segun G ku niun hende den bisendario lo ta doño di e kachó.
A splika G tokante e instansianan  konserní den kaso ku e kachó sigui bini
E kachó a kore bai i no por a hañ’é mas.
Polisnan a kontrolá den bisendario pa mira si un hende por ta na altura ken tabata e doño di e kachó, pero sin resultado.
Mirando ku G tabata un pèrsona di edat avansá i kasi no tin famia riba Aruba, lo sigui tira kontròl durante dia en konekshon ku e situashon
Tin atenshon pa e kaso

SCP a wòrdu poné na altura di e kaso.
=======================

         KIEBRO DI OUTO.

SCP a dirigí patruya na Golfweg en konekshon ku un kiebro di outo.
Yegando na e sitio polisnan a papia ku e hòmber di nòmber K, kende a deklará ku e ta mekániko i ku deskonosínan a drenta su kurá entre 27 desember 2016 i 4 yanüari 2017 i a hòrta for di 2 outo di su klientenan.
Nan a bai ku e plachinan di number ( tantu dilanti komo patras),numerá A-66184, for di un outo kòrá marka Toyota modèl Corona.
Tambe nan a bai ku e bateria di e outo aki.
Tambe nan lo a hòrta e bateria di un pikòp blanku di e marka Daewoo i modèl Musso i un kaha di hèrmènt, yen di hèrmènt.
A tuma deklarashon

SCP a wòrdu poné na altura di e kaso.
=======================

    KACHÓ KU TA MORDE

Riba 5 yanüari 2017, SCP a dirigí patruya na Sero Janchi 57 en konekshon ku un kachó ku a subi tereno di e adrès menshoná i a ataká e kachó di e kas i a herid’é gravemente ku konsekuensia ku el a bin fayese despues.
Según e doño di e kas di nòmber V, e kachó lo a bini for di Sero Janchi 109.
Ora ku polisnan tabata bayendo  na e kas pa papia ku e doño, polisnan a topa ku un kolega kende a splika ku e kachó di Sero Janchi 109 lo a yega di atak’é.
E doño di e kas no tabatey.
Polisnan a papia ku su yu hòmber, kende a deklará ku probablemente su ruman muhé lo a laga e porta di kurá habri di moda ku e kachónan a haña chèns di sali bai.
Mesora el a bai buska e 2 kachónan.
Bèk na warda, polisnan a tuma kontakto telefóniko ku e doño di e kas di nòmber Marco.
Polisnan a splik’é tur loke a pasa i poné na altura ku e tin di kubri e gastunan di e daño kousá.
El a mustra komprenshon

CvD i CP a wòrdu poné na altura di e kaso.
=======================

           KACHÓ LOS
SCP a dirigí patruya na altura di Argentiniestraat 15 en konekshon ku un kachó ku ta kana lòs.
Na e sitio polis a papia ku e señora P.
El a deklará ku durante dia el a pasa banda di e adrès menshoná i ku algun kachó atak’é. 
El a bolbe na e adrès huntu ku un amigu pa alertá e habitantenan.
I nan reakshon tabata negativo.
E habitantenan di e kas 15 a deklará ku nan kachónan lo ta den kurá henter dia i ku e  kurá lo ta sufisientemente haltu di moda ku e kachónan no por sali.
Na e kas enfrente polisnan a haña un kachó pafó.
A papia ku e habitantenan tokante nan kachó ku ta lòs riba kaya.

A pone SCP na altura di e kaso.
=======================

This site uses Akismet to reduce spam. Learn how your comment data is processed.

error: Content is protected !!
%d bloggers like this: