Mas detayes di e asesinato ku a tuma luga riba e rapper “BECHOLIZE” 

Marduga di 19 Yanuari 2017 Edrich Kopra nasé na Kòrsou dia 26 di sèptèmber 1991 a bin perde su bida na man di algun persona ku a sefta e rapper aki ku bala. 

Manera ta konosi for di den kareda di 3or di marduga ku ta trata di Edrich Kopra miho konosi komo “Becholize” un rapper hopi konosi den e mundu di frandula urban.

 Tin indikashon ku tres hòmber kara tapá ku maskarada di ‘smiley’ i un di nan sin nada na su kara a baha for di outo i kuminsá basha bala riba nan víktima. Ora ku e víktima a kuminsá kore i tabata trata di saka su arma, un otro a kontr’e di un otro banda i a kaba di likid’é.

 E patruya ku a yega na e sitio a topa ku e hòmber víktima ku vários herida di bala rònt di su kurpa ku no tabata duna señal di bida. For di un investigashon preliminar ku polis a realisá na e sitio a resultá, ku e víktima tabata para huntu ku mas persona ta kombersá. Diripiente varios suheto den un outo shinishi a kore yega i basha bala dirigí riba e víktima. Durante di e tiroteo aki un otro persona ku tabata huntu ku e víktima a risibí herida di bala na su brasa drechi. 

E víktima tambe tabatin arma di kandela, el a trata di saka esaki pa defendé su kurpa, pero e no a logra. Despues di e tiroteo amigunan di e víktima a kue e arma i kore bai. Nan a trata di kita su kadena, pero esei nan no a logra kita.

Un vehíkulo ku tabata para den e serkania tambe a haña dos perforashon di bala.

Segun e rumornan ku ta sirkulá, na e sitio di e insidente ta indiká ku ta trata di un problema ku a kuminsá for di aña pasá i ku tabatin hopi menasa di ámbos banda. Ayera e problema a eskala i kaba den asesinato.

Kontinuando ku e investigashon, riba kaminda pa rotònde Zegu direkshon pa aeropuerto tabatin un SUV na kandela paresido na esun ku tabata envolví den e tiroteo, polis a konfiská e fròt pa mas investigashon.