MINISTERIO PUBLIKO TA INFORMA
Info OM:
Parkèt di Prokuradó-general (PPG) no ta bai duna Landsrecherche Kòrsou enkargo pa hasi un investigashon mas profundo relashoná ku un keho di 10 di yanüari 2017 di 9 miembro di Parlamento kontra sr. Humphrey Davelaar ku na e momentu ei tabata Presidente di Staten. Ministerio Públiko (OM) no ta haña uso di e proseso penal na e momentunan aki na su lugá. Esaki OM a duna e denunsiantenan komo kontesta por eskrito awe.
E denunsiantenan ta di opinion ku e manera ku e reunion di Parlamento a tuma lugá, despues ku algun miembro di Staten a akseptá un poseshon komo minister, no a bai konforme e prosedura korekto i ku e dokumentonan ku a keda trahá den e prosedura aki mester keda apuntá komo falsifiká. Sr. Davelaar lo a hasi su mes ku esaki, konforme e denunsia, kulpabel na un hecho kastigabel, di akuerdo ku e denunsiantenan.
Ministerio Públiko ta di opinion ku e punto di bista di e denunsiantenan mester ta tópiko den un debate demokrátiko den Parlamento. Un posibel kontesta for di e debate por ta ku mester bin mas regla tokante proseduranan òf tin ku yega na entendimentu tokante interpretashon di e reglanan aktual. Uso di e instrumento penal por polarisá e debate en bes ku e ta stimulá un debate. Pa e motibu aki Ministerio Públiko a disidí p’esei ku ta mantené máksimo moderashon den esaki, promé ku inisiá un proseso penal.