Minister Koeiman a tene interkambio intensivo i fruktífero ku sindikato SITEK

Minister Koeiman a tene interkambio intensivo i fruktífero ku sindikato SITEK

WILLEMSTAD – Djárason anochi 25 di yanüari 2017 Minister di Enseñansa, Siensia, Kultura i Deporte, sr. Hensley Koeiman a tene un reunion intensivo ku representantenan di direktiva di SITEK na sede di e sindikato. Na inisio di e reunion tantu Minister Koeiman, komo presidente di SITEK, sr. Lio Plantijn, a ekspresá satisfakshon di por a bini huntu pa diskutí puntonan di interes na benefisio di ‘enseñansa’ i alabes trata puntonan ku ta rekerí atenshon riba término kòrtiku. Minister Koeiman tabata kompañá pa su tim di sosten ku el a introdusí na direktiva di SITEK. Sr. Plantijn na su turno a ekspresá satisfakshon di e SITEK ku Minister Koeiman a skohe profeshonalnan ku un kurason pa sektor di enseñansa i ku ta personanan di eksperensia amplio pa asesor’é pa hiba enseñansa na Kòrsou na e nivel deseá pa tantu gobièrnu, e sindikato i trahadónan den e sektor.

Seguidamente sr. Plantijn a informá ku SITEK tin un lista di 19 punto di atenshon ku e sindikato ke trata ku gobièrnu, pero a opta pa skohe algun ku na punto di opinion di e sindikato ta rekerí atenshon riba término kòrtiku. E reunion a kana di un forma hopi efisiente i den un esfera agradabel ku interkambio entre representantenan di e ministerio E.S.K.D. i di sindikato SITEK.

Durante di e reunion sr. Plantijn a entregá na Minister Koeiman kopia ‘onderwijs arbeidsomstandigheden’ relashoná ku e akuerdo ku Gobièrnu a sera ku e sindikato na luna ougùstùs di aña 2016.

Na final di e enkuentro sr. Henry Vijber, sekretario general interino di ministerio E.S.K.D., a rekompilá puntonan di atenshon ku a bini na òrdu den e reunion i a informá kiko lo haña atenshon inmediato di e ministerio, kua riba término kòrtiku i kua riba término mediano. A palabrá ku:
• Minister Koeiman lo enkargá ministerio E.S.K.D. pa mas pronto posibel traha riba ehekushon di e diferente proposishonnan den e konvenio aki i tambe pa pèrkurá ku ehekushon di konvenio aki lo forma parti integral di e programa di gobernashon ku ta trahando riba dje.
• Tantu minister Koeiman komo SITEK ta di akuerdo ku mester atendé e retraso den posishon hurídiko di tur trahadó den enseñansa. Minister lo drenta den kontakto ku direktivanan di skol i ku ministerio E.S.K.D. pa atendé e puntonan relashoná ku posishon hurídiko den e konvenio ku prioridat.
• Gobièrnu lo dediká mas atenshon pa e situashon di seguridat na skolnan. Relashoná ku e punto aki SITEK a informá Minister Koeiman ku e sindikato a traha riba un proposishon di lei. A entregá esaki ofisialmente i di informashon ku e sindikato ta disponé di dje a informá ku ‘Raad van Advies’ a duna su reakshon relashoná ku e proposishon di lei. SITEK i minister Koeiman a palabrá ku lo eksplorá e posibilidat pa e aktual gobièrnu kontestá e preguntanan di Raad van Advies. Alabes Minister lo enkargá Ministerio E.S.K.D. pa formulá un konseho relashoná ku e punto di aki.
• Tantu Minister Koeiman, komo SITEK ta di akuerdo ku solushon pa e problemátika di skarsedat di maestro mester ta di un prioridat máksimo. Dentro di un siman Minister lo presentá un proposishon pa tur instansia konserní traha konhuntamente riba proposishonnan konkreto ku lo mester tin efektonan positivo riba e aña eskolar 2017/2018.
• Mas aleu Minister i SITEK a akordá ku e proseso pa yega na un protokòl nobo pa transporte eskolar ta kla. Konhuntamente lo fiha un fecha pa dentro di dos siman por firma un ‘protokòl nobo di transporte’ ku SITEK komo representante di e shofùrnan ku ta transportá mucha di skol.
• Konsiderando e nesesidat urgente pa realisá desaroyonan positivo pa loke ta trata formashon di trahadónan di fishi na Kòrsou, Minister i SITEK a palabrá ku dentro di un siman lo start e proseso pa ehekutá e desishon ku Konseho di Minister a tuma di 3 di febrüari aña pasá pa loke ta trata reorganisashon di FEFFIK.
• Otro punto ku a yega na un palabrashon riba dje ta ku, manera ta palabrá den e konvenio di enseñansa, tur trahadó den e sektor lo a risibí e bónus di fin di aña meskos ku tur ámtenar. Lo hasi tur loke ta posibel pa e maestronan kobra e lokual e trahadónan den enseñansa mester a risibí na luna di desèmber último segun e konvenio ku tabatin.
• Finalmente a palabrá ku huntu lo fiha un fecha pa un diálogo nashonal relashoná ku enseñansa ku lo mester tuma lugá despues di temporada di Karnaval.

Na final di e reunion tantu Minister Koeiman, sr. Plantijn a ekspresá nan satisfakshon pa e forma kon e reunion a desaroyá i ku por yega na realisashon di ophetivonan na benefisio di e sektor di enseñansa, komunidat en general i nos hóben studiantenan en partikular.