PARTIDO MAN TA KONDENA ENFATIKAMENTE EKSPRESHON DI PARLAMENTARIO MELVIN MAC CIJNTE

partidoman-127x85.jpg

PARTIDO MAN TA KONDENA ENFATIKAMENTE EKSPRESHON DI PARLAMENTARIO MELVIN MAC CIJNTE

Libertat di ekspreshon ta algu hopi sagrado pa partido Man. Ta p’esei Partido MAN no ta reakshoná of duna komentario tur biaha.
Partido MAN ke reakshoná i kondená enfátikamente ekspreshon hasi pa Sr. Melvin Cijntje den un entrevista djasabra mainta na un emisora lokal, kaminda a puntra señor Cijntje si e ta dispuesto pa traha ku un polítiko den oposishon aktual i el a kontestá ku e ta dispuesto pa traha asta ku Jozef Mengele.

Jozef Mengele ta un dòkter Aleman, ku a traha den kampo di konsentrashon i tabata responsabel pa morto di miles i miles di Hudiu, personanan ku un desabilidat, personanan mentalmente malu ets. Esakinan tabata presu den kamponan di konsentrashon. Ela usa su konosementu komo mediko, pa skohe esnan ku mester a bai muri den kamber di gas. Den historia ta yama e aktonan aki genoside. Miles i miles di hende a keda matá. E rasa Hudiu i personanan ku un defekto, ta keda eliminá. Jozef Mengele a haña e nomber di Engel des Doods (Angel di morto).

Despues di guera ela hui bai Sur Amerika i a logra skapa pa keda arestá. Ta pesei si un persona haña ku e por usa nòmber di e burdugu aki pa traha kuné, kuestion e logra su meta, Partido MAN ta kondená esaki enfátikamente.
Mas ainda paso nos ta biba den un komunidat kaminda ya pa algun siglo diferente rasa ta biba huntu, kaminda nos ta kuida te kaminda nos por suidadanonan ku un desabilidat i ku nos ke forma un komunidat multikolorido ku respèt i konbibensha ku otro.

Partido MAN ta kondená e ekspreshon di señor Melvin Mac Cijntje ku te asta ta dispuesto pa traha ku Jozef Mengele, de Engel des Doods.

Mirando ku señor Cijntje ta un dje suidadanonan previligiá ku ta okupá un asiento den parlamento, i ku esaki ta trese responsabilidat kuné manera respeta i garantisá seguridat i libertat di gruponan ku ta forma nos komunidat, Partido MAN ta spera ku señor Cijntje lo komprondé embargadura di su ekspreshon i pidi diskulpa.

Partido MAN ke garantisá nos komunidat ku nos lo bringa ku tur nos forsa tendensianan ku por fomentá situashonnan manera nos a konosé den segunda guera mundial, kaminda a persiguí i mata hende pa motibu di nan rasa, kolo i kapasidat.
Nos ta pidi komunidat pa bringa esaki ku tur nos forsa.

Na e komunidat den nos pais ku a bin djafó, spesial e komunidat Hudiu ku ainda tin famianan ku ta sufri di e akshonnan di Jozef Mengele durante Segunda Guera Mundial, nos ke pidi diskulpa pa ekspreshon hasi ku por referí na un temporada hopi tristu den nos historia mundial, ku nunka mas pèrmití di regresá.

Direktiva di Partido MAN.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: