Minister Presidènt Hensley Koeiman ta reuní ku hefe di delegashon di Union Europeo ku sede na Guyana

Minister Presidènt Hensley Koeiman ta reuní ku hefe di delegashon di Union Europeo ku sede na Guyana

WILLEMSTAD – Resien a tuma lugá un reunion entre promé minister Hensley Koeiman i sr. Jernej Videtic, Embahador di Union Europeo ku sede na Guyana. Sr. Videtic tabata kompañá pa Christof Stock, hefe di koperashon pa Union Europeo, miéntras Minister Presidènt Koeiman a ser asesorá pa su konseheronan sra. Lucita Moeniralam, sr. Roy Bottse i sra. Judric Pieters di departamentu di Relashon Eksterior. Tabata un enkuentro pa sera konosí durante kua alabes a tene kòmbersashonnan preparativo pa e Foro di LGO/Union Europeo i teritorionan ultra-mar ku lo tuma lugá den e periodo di 21 pa 24 di febrüari próksimo na Aruba. Un delegashon di Gobièrnu di Kòrsou lo asistí na e foro aki. Banda di esaki a elaborá tambe riba diferente punto relashoná ku Fondo di Desaroyo di Komunidat Europeo. Prinsipalmente kon Kòrsou lo por hasi apelashon riba e fondo pa proyektonan di desaroyo.
A tene alabes un diálogo habrí riba posibel konsekuensianan relashoná ku ‘Brexit’ riba teritorionan ultra-mar ingles ku tambe lo mester bandoná e konstelashon Union Europeo. A papia di entre otro e impakto ku e desishon aki por tin riba paisnan ultra-mar di nos region. Otro tópiko ku a trata ta e relashon ku nos pais lo tin ku Komunidat Europeo despues di 2020.
Ophetivo di tantu Minister Presidènt Koeiman, komo Union Europeo, ta pa riba término korto e koperashon entre Kòrsou i Union Europeo ta mas visibel pa komunidat. A sera un akuerdo pa den un kolaborashon entre Union Europeo i Kòrsou inisiá e aña aki mes trabounan pa mehorá infrastruktura den sinku bario na Kòrsou. E barionan ta Tera Kòrá, Nieuw Nederland, Fortuna Ariba Sapaté Blok H i Kòrtein. Na su debido tempu lo informá komunidat di mas detaye di e proyektonan.