BISHITA DI AGREGADO COMERCIAL DI EMBAHADA CANADES

BISHITA DI AGREGADO COMERCIAL DI EMBAHADA CANADES

Recientemente Departamento di Relacionnan Exterior a ricibi bishita di Sra. Ada Luz Rodriguez, kende ta e Agregado Comercial (Senior Trade Commisioner) nobo na Embahada di Canada na Caracas, Venezuela. Esaki ta alavez e prome bishita di Sra. Rodriguez na Aruba.

Departmento di Relacionnan Exterior a organisa un programa pa Sra. Rodriguez cu a inclui un reunion di introduccion y orientacion cu Director Sr. Edwin Abath, sigui pa un encuentro cu Sra. Lucia White y Sr. Frank Hoevertsz, representantenan di Free Zone Aruba NV y Utilities Aruba NV, respectivamente. Presente tambe tabata Sr. Johannes Vervloed, Consehero di Relacionnan Exterior.

Durante di e encuentro a trata topiconan manera desaroyo sostenibel, como tambe oportunidadnan existente riba tereno comercial. Otro tema interesante tabata e Smart Community, cu ta den pleno ehecucion. Sra. Rodriguez a mustra masha interes den e proyecto aki, indicando cu tin hopi companianan Canades cu amplio conocemento den e area di ‘construccion berde’ y cu sigur lo tin interes pa participa den dicho proyecto.

E funcion di Aruba como “hub” tambe ta di masha interes pa Canada. Lo sigui explora oportunidadnan, conhuntamente cu companianan Hulandes y companianan den area di FreeZone, pa usa Aruba como un hub comercial den region di Caribe. Di parti di Freezone NV, lo analisa cua di e top-sectornan di Aruba lo por cuadra mihor cu e interes di companianan Canades pa asina establece contactonan pa futuro.

Na final di e encuentro, Sr. Hoevertsz a extende atravez di Sra. Rodriguez, un invitacion na compania y institucionnan Canades pa atende e proximo conferencia di “Green Aruba”, cual ta programa pa tuma lugar na luna di november 2017.