Orashon djamars 28 di febrüari 2017

Orashon djamars 28 di febrüari 2017

Ora Hesus a sigui su kaminda atrobe, un hòmber a kore bini serka djE, hinka rudia su dilanti i puntr’É: ‘Mi bon maestro, kiko mi mester hasi pa mi haña bida eterno?’ Hesus a kontest’é: ‘Pakiko bo ta yama Mi “bon”? Niun hende n’ ta bon, Dios so! Bo konosé e mandamentunan: “No mata; no kibra fidelidat di matrimonio; no hòrta; no duna testimonio falsu; no stafa; honra bo mama i bo tata.” ’ E hòmber a kontestá Hesus: ‘Maestro, fo’i chikí mi ta atené mi na tur e mandamentunan ei.’ Hesus a keda wak e duru den su kara i a sinti amor p’e; El a bis’é: ‘Un kos so bo falta. Bai bende tur loke bo tin, duna hende pober e sèn i lo bo tin tesoro den shelu. Despues bin sigui Mi.’ E mucha hòmber su kurason a sera; el a kita bai ku tristesa, pasobra e tabata mashá riku. Hesus a drei wak rònt di djE i a bisa su disipelnan: ‘Esta difísil pa un hende riku drenta reino di Dios.’ E disipelnan a spanta di loke El a bisa. Hesus a bolbe bisa nan: ‘Mi yunan, esta difísil pa drenta reino di Dios! Ta mas fásil pa un kamel pasa dor di wowo di angua, ku pa un riku drenta reino di Dios.’ Nan a spanta pió ainda i tabata puntra otro: ‘Ta ken antó por haña salbashon?’ Hesus a keda wak nan duru den nan kara i bisa: ‘Esei ta imposibel pa hende, ma pa Dios no; pasobra pa Dios tur kos ta posibel.’ Pedro a kuminsá bis’É: ‘Mira kon nos a laga tur kos i sigui Bo.’ Hesus a kontest’é: ‘Mi ta sigurá boso: niun hende ku bandoná su kas, ruman hòmber i ruman muhé, mama, tata, yu òf tereno pa mi motibu i pa motibu di e bon notisia no ta keda sin haña den e tempu akí shen be mas tantu kas, ruman hòmber i ruman muhé, mama, yu i tereno, pero tambe persekushon, i den mundu benidero bida eterno. Sinembargo hopi di esnan ku awor ta di promé, lo ta delaster i hopi di esnan ku ta delaster, lo ta di promé.’
Marko 10:17‭-‬31 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: