Basta ku violensia sin sentido.

Basta ku violensia sin sentido.
For di aña pasá nos tabata tin un prekupashon hopi grandi. Den e lastu añanan aki nos a bin mira un ola di violensia asotá nos dushi Kòrsou. Anto violensia sin sentido. A yega e momentu pa nos por laga sa ku ta BASTA KU VIOLENSIA SIN SENTIDO.
Ta basta ku: yu ta ataká mama, mayor ta abusá di yu, atrako den tienda, malechor ku ta drenta kas di un hende grandi atrak’é i mat’é pa un par di florin, hóben ku arma , pasa basha bala den bario kaminda tin mas hende ta biba, ku un hóben di 13 aña por ta un kriminal, TA BASTA ku arma ta wòrdu husá pa komuniká kon rabiá un hende por ta, ta basta ku ora mi rabia…… mi tin ku dal bo pa mi por kalma. TA BASTA ku ku bo a bai sali pa dibertí i haña bo morto pa falta di otro, pa a defendé un amigu mester a kita un bida.
Tin hóben ku ta puntra, ku ta asina aki tin ku sigui, nan ta puntra ta kon nan futuro lo ta? Nos di Union Ta nos Forsa ta indigná. I e indignashon aki nos ke pone den moveshon ,ma un moveshon positivo.

Tur kos ku ta físiko i visibel ta presidí dor di e loke ku ta spiritual i invisibel
Si bo ke atendé e kosnan físiko i visibel bo tin ku kuminsá ku e kosnan spiritual i invisibel ku tin nan tras.
Pasó si bo bula e parti aki bo ta pasa e rais “voorbij” i bo ta atendé ku e fruta. I e problema ta na e rais.
Nos ke bai pa traha pa drecha e rais i no e fruta .
I e rais ta e kurason di hende ku a bira duru. Tin ku trese bek Fe , Speransa i mas ku tur kos Amor.

E manera ku nos lo kombatí e ola di violensia aki ta atakando e manera di pensa. Bo por mata un hende pero nunka lo bo por kaba ku un idiologia. Den e tempu di kuaresma aki nos tur komo un pueblo lo bai duna bèk. Lo tin 5 siman di hasi un akto amabel.
5 pa 11 di mart : Nos lo pone e pic aki riba tur nos retnan sosial pa rekòrdá e hóben ku nan a asesiná lastu ei den punda. (D’xiane Ogenia RIP)
12 pa 18 di mart : Pensa positivo. si un hende a pone bo rabia keda positivo, den tráfiko, òf ku bo ruman. Hasi esfuerso pa reakshoná den amor.
19 pa 25 di mart : Pordoná, no pasó e meresé, pero pa abo por biba ku pas den bo kurason.
26 mart pa 1 di aprel: Un palabra pa enkurashá otro. Skibi algu positivo i lag’é pa e hende sin e sa ta ken òf yuda un famia ku algu. (kompras, drecha algu den nan kas, hiba yu skol etc)
2 pa 8 di aprel : Yama danki. Un hende den bo bida ku a nifiká hopi pabo. Bis’é dikon bo ta agradesido.
Dia 9 april: Nos lo tin un marcha silensioso pa tur víktima di violensia sin sentido. Na final nos lo revelá e muraya ku lo para pa e punto pa konmemorá tur víktima di violensia sin sentido.