KOPERASHON MAN I PIN: UNION REAL PA ATENDÉ KU RETONAN NA KÒRSOU

Miembro(nan) di Konseho di partido Partido MAN i partido PIN den nan respektivo reunion selebrá djasabra 11 di novèmber ultimo, ambos di forma unánime i pa aklamashon, a disidí pa próksimo elekshon pa Parlamentu, partisipá ku un lista konhunto. Ambos partido por lo pronto ta keda entidatnan hurídiko independiente ku nan propio struktura i liderazgo di kada partido. Sinembargo, e kombinashon MAN-PIN ta bai elekshon ku un (1) programa di elekshon, un (1) lista di kandidato, liderazgo di kampaña i un (1) ”lijsttrekker” determiná konhunto. E “lijsttrekker” di e lista konhunto MAN-PIN ta sra. Giselle Mc William.

A base di resultado di ultimo elekshon partidonan a yega na un akuerdo ku MAN ta presentá 17 kandidato i PIN 12 kandidato pa forma e lista konhunto di 29 kandidato. Kada partido ta keda responsabel pa selektá i presentá nan mihó kandidatonan a base di kriterionan ku partidonan akorda ku otro.

Meta di e kolaborashon aki ta pa uni forsa polítiko i pa frena divishon i fragmentashon den polítika i tambe den nos pueblo. Ku e unión aki e partidonan ta pone un base fuerte pa gana konfiansa di pueblo. E problemanan aktual di e.o. pobresa, desempleo, enseñansa, salubridat ku listanan largu di espera, eskases di bibienda, infrastruktura, transporte públiko, violensha doméstiko, komportashon di hobennan, nesesidat di adulto mayor, kuido di nos grandinan, kresiente desigualdat i krisis klimatológiko, ta rekerí unión, forsa di akshon i inovashon pa logra solushonnan sostenibel i duradero.

Pa garantisá ku e proseso prome, durante i despues di elekshon ta kana di forma koherente, ta bai tin un unidat di maneho di koperashon konsistiendo di Lider Polítiko i Presidente di kada partido huntu ku un sekretariado.

Partido MAN i partido PIN ta kere firme ku traha huntu ta hasi partidonan mas fuerte.