Djamars 7 di mart RKV FC Sithoc ta kumpli 75 aña di eksistensIa.

Djamars 7 di mart RKV FC Sithoc ta kumpli 75 aña di eksistensIa. Esaki ta motibu di húbilo. Pa selebrá e fecha aki direktiva di Sithoc ta invitá tur su miembronan, x Futbolistanan di Sithoc, Sithoc Veterano, x miembronan di direktiva, (x)coachnan, tur boluntario i ekiponan di futbòl di Kòrsou en partikular i pueblo di Kòrsou en general pa asistí na un Santu Sakrifisio di Misa na Misa di Sta Maria, 7or di anochi, pa asina gradisí nos bon Dios pa e 75 añanan di eksistensha. Nos ta spera ku un i tur por ta presente.

Direktiva di Sithoc ta yama danki na tur ku ta tin e inspirashon, determinashon, kurashi i amor pa futbòl i ku inkansablemente a hinka nan skouder, tempu i konosementu den nos ekipo ku awe nos por selebrá 75 aña.

E meta pa krea futbolista, duna nos hobennan mucha hòmber (i awe mucha muhé tambe) oportunidat real pa hunga bala, desaroyá téknika en partikular i desaroyo propio en general, sigur a duna fruta durante e 75 añanan di eksistensha. Nos tur sa ki influensha positivo deporte en general tin riba desaroyo di hobennan i henter un pueblo. Den esaki Sithoc ta kontentu ku e tambe por a yuda.

Naturalmente ta nos tur su deseo, pa Sithoc sigui forma parti indispensabel di nos komunidat en general i nos deporte futbòl en partikular. Den e kuadro aki, nos tin algun plan, ku durante selebrashonnan ku lo sigui den 2017, nos lo informá nos komuidat di dje. Nos ta konta ku boso apoyo.

Na nòmber di direktiva,

Silvana Willems-Trinidad – Sekretario Stanley Gijsbertha – Presidente Willemstad. 6 di mart 2017 Presente

This site uses Akismet to reduce spam. Learn how your comment data is processed.

error: Content is protected !!
%d bloggers like this: