Sentro multifunshonal na Barber mester di un rosea! Algun Parlamentario barika yen a stroba e proseso pa gobièrnu finalisá e proyekto!

Sentro multifunshonal na Barber mester di un rosea! Algun Parlamentario barika yen a stroba e proseso pa gobièrnu finalisá e proyekto!

Willemstad Manera ya ta konosí e akuerdo di gobernashon “Dignidat Humano ta Sentral”, ku a firma resientemente na Parke Himno i Bandera na Barber I ku mester a sirbi pa gobièrnu por kumpli ku deseo di pueblo, a wòrdu sabotiá dor di un grupo di Parlamentario ku pa set di poder a disidí ku nan ta bira lomba pa e akuerdo na benefisio di pueblo, pa nan por sirbi nan propio interes personal despues ku nan partido a duna nan e konfiansa di representashon den Parlamento di Kòrsou. Esei ta nifiká ku e plannan ku gobièrnu kier a ehekutá pa medio di e akuerdo ya menshoná, ta sufri retraso.
E akuerdo di 2016 e.o. ta suprayá e importansia di edukashon físiko en general i deporte en partikular siendo pilanan importante ku ta kontribuí na formashon i salú físiko mental di hende. Pa por hasié esei mester di akomodashon. Un di e akomodashonnan ku plannan konkreto pa konstrukshon tabata kompletamente kla for di yüli 2010 kaminda e tempu ei e mandatario sra. Marilyn Alcalá-Wallé huntu ku su kolega di infrastruktura a prepará e trabounan pa inisio di konstrukshon. E fondonan a wòrdu reserva pa por a realisá e konstrukshon te ku dia di awe no ta funshonal!
Un rekorido na e sitio resientemente a duna un bista realmente tristu di hinter e situashon, kaminda kambionan di gobièrnu desde 10-10-10 a opstakulisá hinter e trayekto pa Bándabou por disponé di un sentro deportivo multifunshonal ku e meresé.
E idea original di e sentro tabata pa durante orarionan di skol, e skolnan den e besindario, esta e.o. Kolegio San Hose, Joseph Civilis i Skol Ala Blanka lo a hasi uso di dje pa e hóbennan durante ehekushon di e area di formashon “Estilo di bida salu i formashon físiko” i despues di e orarionan menshoná spesialmente abitantenan i organisashonnan deportivo den e barionan den e terser distrito tambe por hasi uso di e fasilidatnan di Barber.

Tumando nota di e situashon na Barber resientemente sra. Alcalá-Wallé a pidi atenshon pa e sentro i alabes a hasi un kantidat di pregunta pa sa e status di e konstrukshon di e sentro na Barber i e plan pa finalisashon di sentro multifunshonal. E preguntanan ku a ser hasi na e minister di Deporte ta lo siguiente:
1. Kua servisio di gobièrnu(nan) responsabel pa ehekushon di realisashon di e plan deportivo pa Kòrsou I den e kaso spesífiko aki pa realisashon di e plan deportivo multifunshonal na Barber?
2. E plan original pa konstruí e sentro multifunshonal na Barber a keda idéntiko (vèlt, sala, pisina) o amodifiká e plannan?
3. Kua ta e plan aktual I gobièrnu por manda un bista di dje pa Parlamento?
4. Kiko a sosode ku e sumanan ku a reserva originalmente pa e sentro multifunshonal?
5. Tin un kambio o traspaso di propiedat pa un òf otro organisashon?
6. E organisashon responsabel pa realisashon di e sentro multifunshonal a risibí e fondonan nesesario?
7. Kua ta e instansianan ku ta aportá ku fondo pa realisá e sentro menshoná?
8. Suskrito a nota, ku tin un emblema masha grandi di Refineria Isla riba e parti di e sentro ku a wòrdu konstruí. Esei ta nifiká ku gobièrnu mes no a inbertí mas den sentro?
9. Kua ta e ròl di Reda Sosial ku a komprometé tambe pa duna un man
10. I kua tabata e eksigensianan di Reda sosial?
11. Gobièrnu tin un fundashon alabes ku ta responsabel pa guia I mantenshon di e sentro multifunshonal menshoná?
12. Tin un instansia na Bándabou ku tin e enkargo pa operashon I mantenshon di e sentro o e ta den man di e Fundashon Desaroyo Deportivo Kòrsou?
13. Pa kuantu tempu kaba e sentro ta den konstrukshon?
14. Ken ta responsabel pa e sentro tumando nota ku e parti ku a wòrdu konstruí no ta funshonal I ademas di esei no tin ningun forma di mantenshon?
15. Kua parti mas di e sentro mester wòrdu konstruí?
16. Gobièrnu a nota ku e parti ku ya a wòrdu konstruí ta den dekadensia?
17. Kua ta e skema pa finalisá e proyekto aki na Barber??
18. Kon e skolnan aktualmente ta hasi na formashon físiko?
19. Tin un enkuentro regular ku e instansianan relevante pa monitor e konstrukshon di e sentro?
20. Tin un suma ku ta reservá anualmente pa mantenshon di e sentro Multifunshonal?