Elsa Rozendal di MAN: Pobresa ta inakseptabel, espeshalmente bou di hende muhé.

March 8, 2017 REDAKSHON

Tur aña riba Dia Internashonal di Hende Muhé nos ta para ketu na e hende muhé i e desaroyo di hende muhé atrabes di añanan. Nos ta selebrá logronan pero tambe nos ta para ketu na opstákulonan i retonan ku ainda e hende muhé ta enfrentá diariamente.

Aki na Kòrsou, nos ta bibando den un komunidat kaminda tin mas ku 6000 kobradó di onderstand di kual 70% ta hende muhé. Kemen pobresa bou di hende muhé ta grandi. Pobresa ta stroba desaroyo di e hende i su famia, konsekuentemente desaroyo di nos pais. E manera mas efektivo pa kombatí pobresa ta pa medio di trabou segun Rozendal.
Mientras ku tin un hende muhé den nos komunidat ku no por kumpli ku nesesidatnan básiko di su mes i su famia, nos lucha di solidaridat di hende muhé no a kaba.
Den pasado MAN a ehekutá varios proyekto pa empoderá e hende muhé ku ta kobra onderstand. Asina entre otro a entrená 100 hende muhé ku ta kobra onderstand pa traha na refeneria Isla. A entrená e hende muhé pa e por traha komo “Alfa Hulp” pa duna kuido na kas na hendenan desabilitá.
Pa Elsa Rozendal i partido MAN e hende muhé ta klave den nos komunidat i den famia. Rozendal i MAN lo sigui hasi tur loke ta den nan alkanse pa kombatí pobresa, empoderá e hende muhé i brinda oportunidat pa trabou.
Rozendal ta felisitá tur hende muhé riba Dia Internashonal di Hende Muhé i ta duna un palabra di apoyo na tur nos hende muhénan balente i luchadó di Kòrsou.