Minister Koeiman ta tene enkuentronan spesial ku empleadonan femenino di Ministerionan ESK&D i Asuntu General den kuadro di Dia Internashonal di Hende Muhé

Minister Koeiman ta tene enkuentronan spesial ku empleadonan femenino di Ministerionan ESK&D i Asuntu General den kuadro di Dia Internashonal di Hende Muhé

WILLEMSTAD – Riba Dia Internashonal di Hende Muhé Minister Hensley Koeiman a tene de promé oranan di mainta un enkuentro ku e empleadonan di e sekso femenino di e Ministerio pa Enseñansa, Siensia, Kultura i Deporte. Despues di e felisitá esnan presente den kuadro di e fecha spesial aki, Minister Koeiman a kompartí algun obra literario di su outoria ku e personal di Ministerio ESK&D.
Den e oranan tempran di mèrdia, despues di a terminá ku reunion di Konseho di Minister, Minister Koeiman a tene un enkuentro ku e personal femenino empleá na Ministerio di Asuntu General. Den un enkuentro ameno el a felisitá e empleadonan aki tambe den Fòrt Amsterdam i alabes a kompartí algun di su obranan dediká na e hende muhé. Na tur enkuentro Minister Koeiman a parti un ‘booklet’ konteniendo algun di su poemanan i tambe un rosa.
Den oranan di atardi Minister Koeiman a realisá bishita na Kas di Kuido di Hende Grandi na Habaai i tambe a hasi un bishita na Sint Elisabeth Hospital. Na ámbos instansia e titular a regalá un ‘booklet’ konteniendo poema di su outoria i tambe un rosa na pashèntnan femenino i algun traha di SEHOS di e sekso femenino.
Den oranan tempran di anochi Minister Koeiman a tene un diskurso nashonal via plantanan di televishon lokal pa mustra riba e importansia di hende muhé den nos komunidat i ekstendé palabranan di apresio i felisitashon na tur hende muhé na Kòrsou.