Sostenementu di lista pa agrupashonnan polítiko
Sostenementu di lista pa agrupashonnan polítiko
Djasabra 18 i djadumingu 19 di mart 2017, entre 8or di mainta i 8or di anochi tur persona ku tin derechi di vota, por sostené un di e 6 agrupashonnan polítiko ku tin mester di sosten pa por partisipá na elekshon di 28 di aprel 2017.
Artíkulo 16 insiso 1 di e Ordenansa di Elekshon (A.B. 2010 no. 87) ta stipulá ku pa por partisipá na elekshon, kada lista di kandidato, ku eksepshon di lista di e agrupashonnan ku ta representá den Staten, mester keda sostené pa un kantidat di votadó igual na 1% di e votonan bálido ku a keda emití den e último elekshon di Staten.
Den e último elekshon di Staten tabatin 79.120 voto bálido. Esaki ta enserá ku agrupashonnan polítiko, esta DP, Movementu PUSH Kòrsou, Movementu Kousa Promé, PAN, PIN i LKKK ku no tin representashon den Parlamento, mester haña sosten di por lo ménos 792 votadó pa por partisipá na elekshon di 28 di aprel 2017.
Pa e sostenementu di lista Konseho Supremo Elektoral ta pone lo siguiente na konosementu.
• 6 Partido lo partisipá na sostenementu di lista.
• Riba e Lista di sosten “ondersteuningsbiljet” tin nòmber di e listanan i nòmber di e promé kandidato di e listanan. E listanan ta numerá di 1 te ku 6.
• E sekuensia di e agrupashonnan polítiko riba e lista di sosten ta lo siguiente: 1: Democratische Partij
2: Movementu PUSH Kòrsou
3: Movementu Kousa Promé
4: Frente Obrero-Partido Aliansa Nobo
5: Partido Inovashon Nashonal
6: Liberalismo Klásiko Komunidat di Kòrsou
• Votadó mester bai ku sédula, reibeweis òf pasport bálido pa identifiká su mes.
• Asina e votadó drenta urna, tur kos ta kasi meskos ku riba dia di elekshon mes.
• Tuma e Lista di sosten “ondersteuningsbiljet” i pasa pa un di e hòkinan pa sostené un lista.
• Usa e pòtlot kòrá pa yena e rònchi parti robes di e nòmber di e lista ku bo ke sostené. Bo por sostené UN (1) lista so.
• Skirbi òf pinta riba e Lista di sosten “ondersteuningsbiljet” òf pone kualke mensahe riba dje, ta hasi’é outomátikamente inbálido.
• Si bo yena algu robes òf hasi un fout, duna e presidente di urna e Lista di sosten “ondersteuningsbiljet” será bèk i pidi un nobo pa bo sostené un lista di nobo. Esaki por sosodé solamente UN (1) biaha.
• Dobla e “ondersteuningsbiljet” i deposit’é den e buzòn.
Por sostené lista na:
Kranshi na Otrabanda / Sentro di Bario Montaña / Sentro di Bario Sta. Maria /
Sentro di Bario Tera Cora / Prof. Dr. I.C. van Houteschool na Brievengat / Skol Marieta Alberto na Koraal Specht / Kolegio San Hose na Barber / A.E. Goilo School na Julianadorp. Detenidonan por sostené lista na Sentro di Detenshon Bon Futuro mes.
