GOBIÈRNU VENEZOLANO A KANSELÁ ÚLTIMO BUELONAN HUMANITARIO PA VENEZUELA

 

WILLEMSTAD – Ministerio di Hustisia konhuntamente ku Direktorado di Relashonnan Eksterior den koperashon ku Kònsùl di Venezuela, a hasi esfuerso henter aña pa vários Venezolano na Kòrsou por a regresá nan pais a pesar di e situashon kaminda e fronteranan ta será. Gobièrnu di Kòrsou a plania 2 buelo den luna di desèmber 2021 pa asina por a duna siudadanonan Venezolano chèns pa regresá nan pais pa e dianan di fiesta. Lamentablemente, na último ora Gobièrnu di Venezuela no a duna pèrmit pa e buelo di dia 21 di desèmber 2021 i tampoko pa e buelo di dia 22 di desèmber 2021.

Ministerio di Hustisia, Direktorado di Relashon Eksterior, Konsulado di Venezuela na Kòrsou i Laser Airlines a hasi tur intento pa por a salbaguardiá e buelonan akí. Tabatin hasta dos buelo pendiente pa dia 22 di desèmber 2021 den koperashon ku Laser Airlines. A pesar di tur esfuerso ku a keda hasí no por a logra pa e buelonan akí por a sali pa Venezuela. Konsekuentemente, pasaheronan ku a bini for di Boneiru i Kòrsou, ku ta kasi 300 Venezolano, no por a yega Venezuela i a keda desampará.

Gobièrnu di Kòrsou pa medio di e kanalnan diplomátiko i tambe via di Ministerio di Hustisia ta bai keda hasi tur loke ta posibel pa solushoná e situashon akí.