ASISTENSIA POLIS DI ARUBA RIBA 13032017

DETENSHON.
Riba 13 di mart 2017, alrededor di 03:30, durante un kontròl, patruya Noord a konstatá ku na altura di High Rise Hotel, tabatin un Great Wall Florid, kolor blanku,numerá A-43497 koriendo sin iluminashon, riba kaminda públiko.
Polisnan a duna e shòfùr, señal pa para na altura di Palm Beach Plaza, kende a sigui e òrdu tambe.
E shòfùr no tabata den posishon di un reibeweis Arubano bálido.
Probablemente e tabata bou di influensia di alkohòl, motibu pa kuá a deten’é pa banda di 03:40.
El a wòrdu hibá na warda di polis Shaba.
CP a wòrdu poné na altura di e kaso.
===========================.
DUNAMENTU DI ASISTENSIA.
SCP a dirigí patruya, alrededor di 13:40 na LG. Smith Boulevard na altura di Pizza Hut, pa un dama shòfùr, den un Toyota Tercel, kolor blanku, ku lo a bira malu i a para su outo kantu di kaminda.
Seguidamente e unidat di K-9 a notifiká SCP ku nan tabata den bisendario i ku nan lo bai na e sitio.
K-9 a informá polisnan ku ora nan a yega na e sitio, nan a topa ku e dama tabata bludu pisá for di su nanishi.
Polisnan a mira e Toyota Tercel,numerá A-55496.
E shòfùr, e dama di nòmber GHP, tabata keha di dolor di kabes i tabata bludu for di su nanishi.
El a konta ku ta diripiente el a kuminsá sinti su mes malu. Dor di esaki, el a disidí di para kantu di kaminda.
Mirando ku e shòfùr tabata konsiente i por a konta tokante di su situashon, polisnan a disidí di transport’é pa hospital den su propio vehíkulo.
Un di e polisnan a manehá e Tercel i e otro a kore e outo di polis, su tras, rumbo pa hospital.
Yegando hospital, alrededor di 13:55, e vigilante a trese un ròlstul.
E dama mes, riba su propio forsa, a bai sinta den e ròlstul i a wòrdu hibá paden pa tratamentu médiko.
SCP a wòrdu poné na altura di e kaso.
============================
KIEBRO .
SCP a dirigí patruya na Club Universal na Pos Chiquito.
Na e sitio, polis a papia ku e dama C, kende a deklará ku deskonosínan a kibra drenta den e Club i a bai ku e “cooler”.
Denunsia a wòrdu tumá.
CP a wòrdu poné na altura di e kaso.
============================
ASISTENSIA.
SCP a dirigí patruya na altura di Aldo travel bureau, na emmastraat, en konekshon ku un bagabundo ku lo a ingerí algu straño i ku tambe tabata hasi kosnan straño
Polisnan a bai na e sitio i a topa ku e konosí pa polis, e hòmber H.I Tromp. Mihó konosí komo HIT.
En bèrdat e tabata aktua di forma straño.
Polisnan a mand’é bai i el a bisa ku e kier bai su kas.
SCP a wòrdu pone na altura di e kaso.
============================
LADRONISIA.
SCP a dirigí patruya na e supermerkado yamá “Springfield”, situá na Bernhardstraat, en konekshon ku un kaso di ladronisia.
Na e sitio, polis a papia ku e dama X.
X ta e propietario di e supermerkado ariba menshoná.
X a deklará ku riba e dia ey, 13 di mart 2017, alrededor di 16:00, un hòmber deskonosí p’e a drenta e establesimentu i a kohe un saku di “Marshmallow”.
E hòmber aki a habri e saku i a kuminsa kome den e supermerkado.
Un trahadó di e supermerkado a tene e hòmber, dor ku e tabata para kome, siendo ku e no a paga ainda.
Despues di esaki, e hòmber a kuminsá fèrfelá i kier a bringa ku nan.
X a deklará ku e hòmber tabatin solamente 2 florin huntu kun’é, i ku e saku ta kosta 3 florin
Mas aleu X a sigui deklará ku e no ta preokupá pa e sobrá sèn, pero ku solamente e ke pa e hòmber sali for di e supermerkado i no regresá mas.
Na yegada di polis, ya e hòmber a bai for di e sitio.
Un kliente di e supermerkado ku tabata na e sitio, a deklará ku e konosé e hòmber, kende ta un bon konosí pa hustisia, e vagabundo yamá “Boedoem”.
SCP i CVD a wòrdu pone na altura di e kaso.
============================
ROBO.
SCP a dirigí patruya na Aruba Juniors pa un kaso di ladronisia.
Na e sitio, polis a papia ku e hòmber R, kende a deklará na polis ku riba 13 di mart 2017, alrededor di 21:00, el a wòrdu hòrtá na altura di Rudolf Arenstraat # 21, dor di un hòmber deskonosí ku tabatin un arma di kandela.
E hòmber menshoná a yega riba un motorsaikel kolor pretu deskonosí pa e viktima i e tabatin un hèlmu será kolor pretu ku blou.
E hòmber a saka un pistól pretu i a dirigí esaki riba dj’e i a bisa: ” Dame tu mochila”.
E arma di kandela ta unu deskonosí pa R, pero el a bisa ku esaki sigur tabata un revòlver.
E tas ku R tabatin den su poder, tabata kontené un par di sapatu di fútbòl, kolor pretu ku bèrdè di e marka Nike, sais 11
E hòmber a bai ku esakinan.
E hòmber ta entre 1.70m i 1.80m, kolor di kurpa no tabata konosí.
Su stèm tabata unu pisá i tabata papia spaño perfekto.
R no tabata sá den ki direkshon e hòmber a bai despues di e robo.
SCP, CVD i Atrako Team a wòrdu pone na altura di e kaso.
============================
DETENSHON.
SCP a dirigí patruya na e adrès Alto Vista, unda lo a gara un ladron.
Na e sitio, polis a papia ku e notifikante, kende a deklará ku e sospechoso a kore bai.
E notifikante a gara e hòmber den su outo, un Hyundai Greta, kolor blanku, numerá A-66673.
E hòmber lo a ofresé diskulpa i a kore bai.
E sospechoso a wòrdu diskribí di e siguiente manera.
TShirt kolor beige ku manga kòrtiku i un karson te na rudia.
En konekshon ku e diskripshon aki, patruya 2-5 huntu ku 2-7 a sali buska den bisendario.
Riba un kaminda di tera den e area, patruya 2-7 a bin topa ku un hòmber ku e paña ku a wòrdu diskribí.
E hòmber a keda detené na e sitio i a wòrdu hibá mesora na warda di polis Shaba.
Patruya 2-5 a tuma datos i a dirigí e notifikante na warda di rechèrche.
E sospechoso a wòrdu presentá dilanti un fiskal ouksiliar
SCP i WCDT a wòrdu pone na altura di e situashon
Partikularidat…..
E malhechor a laga su baiskel serka PD i esaki a wòrdu hibá na warda di polis Shaba.
============================
KONTRÒL DI TRÁFIKO.
Riba 13 di mart 2017, entre 17:30 i 19:30, patruya Noord a tene un kontròl di tráfiko na e parti ost di e retònde di Tanki Flip.
Alrededor di 19:00 a para e shòfùr di un Chevrolèt Cavalier, kolor di oro, numerá A-19451.
E shòfùr i 2 dama tabata den e outo i tabata di abla spañó.
E shòfùr a duna di konosé di ta M i e 2damanan, respektivamente H i PC.
E shòfùr no por a mustra ni reibeweis, ni ID, ni papel di estadia.
Riba pregunta di polis, si nan tabatin papel di estadia, e 2 damanan a deklará ku nan no tin papel pa por a permanesé riba Aruba.
En konekshon ku esaki, e hòmber i e 2 damanan a wòrdu transportá na IASA na Dakota.
Mas despues e doño di e vehíkulo ya menshoná, e dama F i su ruman muhé H, a presentá na e sitio.
F a deklará ku el a fia su ruman muhé e outo i ku e no konosé e hòmber ku tabata kore e outo.
CVD a wòrdu poné na altura di e kaso.
============================