Ministerio Publiko ta infroma.
Info OM:
Awe Korte a trata un kaso di Ministerio Publiko (OM) kontra 3 sospechoso pa violashon di Lei di Opio. Nan ta 2 sospechoso di Turkia i 1 sospechoso di Korsou.
Nan a ser akusá dor di Fiskal di poseshon ku intento pa transporta 289 kilo di kokaina dia 30 oktober 2016. Nan a keda detene 4 or marduga pa polis na altura di parkeerplaats di Hato.
Pa e transporte di droga e trio kier a hasi uso di un avion privá di pilot M.T. (52) ku ta 1 sospechoso den e kaso aki. Banda di e droga a konfiska den e kaso aki tambe un arma di kandela Glock ku 45 bala, maskera, sker pa korta heru, handschoen un vest i un zwaailicht oraño.
For di investigashon di polis a sali na kla ku e droga tabata destiná probablemente pa e suidat di Istanbul na Turkia. Esaki tabata sigun e “flightplan” e destinashon di e avion.
Fiskal a hasi demanda awe di 6 aña prison pa yui di Korsou E.J.W. (41) ku tabata un empleado na Hato, 6 aña pa pilot M.T. i 5 aña prison pa K.A. (54).
Tambe Fiskal a hasi demanda pa “verbeurdverklaring” di e arma di kandela ku munishon i di e jet di 2 motor ku 22 asiento marka Canadair 1989 ku registrashon N545SD ku ta pertenese na un kompania di e pilot.
- E kaso ta den tratamentu ainda. Awor abogado di e sospechosonan ta bai hiba palabra pa su “pleidooi”. Probablemente aki 3 siman Wes ta duna su veredikto den e kaso aki.
