Gobièrnu ta trahando riba un maneho duradero i integral den kuadro di energia

Gobièrnu ta trahando riba un maneho duradero i integral den kuadro di energia

Willemstad – Energia ta hunga un ròl hopi importante den nos bida diario. E ta algu ku nos ta kustumbrá na dje i ku ta asina komun ku nos no ta para ketu kon importante energia ta pa nos ekonomia i tambe nos bienestar. Di e kantidat total di energia ku nos ta importá aproksimadamente 50% ta keda uzá pa elektrisidat i aproksimadamente 50% nos ta uza pa transporte (outonan, trùknan etc.). Di e energia duradero ya instalá na Kòrsou e porsentahe ta un di esnan mas haltu na mundu.
Pa loke ta energia di bientu i solar aktualmente esaki ta 18% di nos produkshon total di energia. Despues di e ekspanshon di e parke di bientu na Tera Kòrá esaki lo subi te aproksimadamente 27%.
Aktualmente nos ta dependé pa gran parti di importashon di energia ku na su turno ta hasi nos vulnerabel pa riesgonan basá riba faktornan eksterno manera fluktuashon riba merkado internashonal di energia ku ta pone ku e preis di energia ta subi pa nos outomátikamente.
Gobièrnu tin e responsabilidat pa fasilitá den e proseso pa yega na un maneho integral pa energia duradero. Den e kuadro aki Ministerio di Desaroyo Ekonómiko ta e ministerio responsabel pa atendé esaki.

Meta di e maneho di energia ta pa aña 2035 nos lo subi nos uzo di energia duradero te ku un mínimo di 40% i redusí nos uzo di energia konvenshonal.
Na e momentunan aki Gobièrnu ta trahando riba un maneho integral duradero di energia. E proseso ta aktualmente den e fase konsultativo kaminda ta deliberá di manera ekstenso ku e gruponan di interes den e kadena energétiko. E maneho ta basá riba e siguiente puntonan di salida.

Na promé lugá tin ku hasi mihó uzo di nos rekursonan di energia duradero manera bientu, energia solar i tambe laman. Nos benefisio ta ku Kòrsou ta un isla bendishoná ku abundansia i akseso na e formanan di rekursonan di energia duradero aki.
Un otro punto di salida ta ku tin ku optimalisá nos uzo di energia diario.
Ora optimalisá e uzo di nos energia diario esaki ta pone ku gastunan di energia lo bahá i di otro banda produktividat lo subi i lo kondusí na un bahada di nos gastunan di hasi negoshi. Bon mirá lo bo por keda hasi mesun kos ku bo tabata hasi anteriormente pero solamente uzando ménos energia. Tambe e maneho lo sòru pa optimalisá uzo di energia dor di introdusí “building code”(kodigo pa konstrukson di edifisio), optimalisá uzo di aparato elektróniko i tambe uzo di iluminashon pa lus di kaya.

Tambe lo tin ku traha riba un struktura di maneho ku por garantisá transparensha di maneho i kontròl di e sektor energétiko.
Ademas tur e akshonnan den kuadro di e maneho integral di energia lo tene kuenta ku ‘best practices’ (kual ta proseduranan mundialmente prueba komo esunnan mas efektivo) den relashon ku e parti ekológiko.

E maneho integral lo trata na kubrí tur e aspektonan ku tin di haber ku e sektor energetíko manera elektrisidat, transporte, preskripshonnan pa konstrukshon, importashon di ekipo i aparatonan etc. Pero tambe e maneho su enfoke lo ta kon pa atkirí mas konosementu riba e tereno di energia duradero i tambe kon por hasi mas investigashon i desaroyo riba esaki.

Un di e áreanan di enfoke den e Plan Nashonal di Desaroyo di Kòrsou ta e parti di durabilidat ku enfoke riba un medio ambiente duradero. Den e áeranan di intervenshon ku a stipulá ta papia di energia duradero (bientu, solar i laman) pero tambe maneho di oséano i kambio di klima. Ademas a integrá dos meta di desaroyo duradero (Sustainable Development Goals/SDGs) huntu ku e parti di durabilidat aki.
Metanan di desaroyo duradero (SDGs) ta metanan ku a keda ratifiká pa Nashonnan Uní na sèptèmber 2015 i nan ophetivo ta pa yuda kombatí pobresa, protehá nos planeta i garantisá prosperidat pa un i tur.
E dos SDGnan ku a intregá pa e parti di durabilidat ta SDG #7: akseso na energia moderno ku ta pagabel, sigur, duradero i moderno pa un i tur i tambe SDG #14: konservá i usa oséano, laman i rekurso marítimo di un manera sostenibel pa un desaroyo duradero.

Gobièrnu di Kòrsou ta mira na momentu ku finalisá e maneho integral di energia kual ta basá riba un aserkamentu inklusivo dor di konsultá tur e aktornan embolbí den e kadena energétiko pero tambe teniendo kuenta ku e parti ekológiko mará na desaroyonan mundial via e asina yamá SDGs, Kòrsou lo tin un struktura ku pasonan konkreto pa por yega na un desaroyo di energia duradero.
Mas importante, esaki lo trese un desaroyo duradero ku ta garantisá un mihó futuro pa e próksimo generashonnan ku por uza esaki pa sigui kuida nos dushi isla.

This site uses Akismet to reduce spam. Learn how your comment data is processed.

error: Content is protected !!
%d bloggers like this: