GOBIERNO INTERINO REALMENTE TA DI PUEBLO?

GOBIERNO INTERINO REALMENTE TA DI PUEBLO?

Awe un Gobièrnu interino, sostené pa 12 miembro di Parlamento a sinta. Dos di e miembronan aki huntu tin un kantidat hopi tiki na voto. Votonan ku nan a haña momentu ku nan tabata forma parti di Partidonan ku na òktober 2016 a haña sufisiente sosten di pueblo pa forma un gobiernu. Esaki ta un Gobièrnu pa òf di pueblo? Den un estado di derecho ta eksistí un trías polítika i un balanse entre “uitvoerende machten” i “controlerende machten”, esta entre Gobièrnu i Parlamento di Kòrsou.

Parlamento tin e posibilidat pa manda un gobièrnu kas, si nan ta di opinion ku e no ta hasiendo su trabou bon. Si un mayoria den parlamento manda un Gobièrnu kas, e Gobièrnu tin ku entregá su retiro na señora Gobernador, manera a sosodé tambe dor di gabinete Koeiman. E Gobièrnu ku a keda mandá kas, pa lei por disolvé parlamento i yama elekshon nobo. Ku otro palabra e gabinete por pidi e pueblo votadó ekspresá su mes den un elekshon liber i demokratiko si e ta haña ku e echo ku e Gobièrnu a keda mandá kas ta hustifiká si òf no.

Ta e pueblo votadó tin e derecho máksimo pa disidí si e partidonan ku huntu ta forma e Gobièrnu a hasi un bon trabou si òf no. E balanse entre Gobièrnu i Parlamento ta perkurá pa un stabilidat di gobernashon i ta e votadó ta e uniko ku por disidí ken e ke pa representé.
Miembronan di Parlamento ku bai ku asiento di nan partido, lo no por manda un Gobièrnu formá pa partidonan ku a gana elekshon kas sin mas i asina stroba kontinuidat di gobernashon. No ta un miembro di Parlamento ta disidí riba su mes si e tin sosten di pueblo si òf no, esei ta pueblo ta disidí. Asina e ta den un Estado di Derecho kaminda ningun hende ni tampoko miembronan di Parlamento i Ministernan ta riba òf por trapa nos leinan demokrátiko. Kualke intento pa para elekshon ta keda konsiderá ku ke sera boka di pueblo. Ke hasi pueblo “monddood” manera nan ta bisa na Hulandes.

Kualke intento pa para elekshon dor di miembronan di Parlamento ta mina derechi di e votadó. Kaminda ta e miembro di Parlamento mester duna kuenta i rason na e pueblo votadó. Asina simple e kos ta i asina e ta funshoná den un Estado di Derecho. A kaso e mayoria den Parlamento no ke pa pueblo papia pa medio di un elekshon? P’esei ke para elekshon i asina mina e derechi fundamental aki di e votadó?
Ta miedu e mayoria den Parlamento, sostené pa miembronan ku a bula waya tin, ku pueblo lo vota masalmente i skohe un otro mayoria?
Ta e mayoria ei ta disidí pa pueblo? Esaki ta un lokura. Esaki ta loke nos ke den nos Pais Kòrsou?
E mayoria mester Goberná den un demokrasia. E mayoria tin ku vota pa proposishonnan komo mandato di pueblo. E mayoria den Parlamento no ta pará riba nos leinan ni tampoko e ta doño di e pueblo votadó. Al kontrario, e pueblo votadó ta disidí ken e ke pa representé den Parlamento. Esaki ta sosodé pa medio di un elekshon liber i demokrátiko ku mester tuma lugá kada 4 aña i segun nos leinan demokrátiko.

E koalishon aktual ta grita ku nan tin un “Gobièrnu pa i di Pueblo” pero realmente e ta asina?
Si un Gobièrnu pa i di Pueblo ta trapa e derechi di e votadó, e ta na bienestar di e pueblo òf kontra di e pueblo?

Nos di partido MAN ta para pa demokrasia i nos no tin miedu pa laga pueblo disidí mediante un elekshon. Nos mester salbaguardiá i defendé nos demokrasia.

Partido MAN