E trayekto interno di fortifikashon lo kontinuá PNP TA BAI HIBA UN KAMPANA POSITIVO BASA RIBA KONTENID
E trayekto interno di fortifikashon lo kontinuá PNP TA BAI HIBA UN KAMPANA POSITIVO BASA RIBA KONTENIDO
Willemstad – Pa loke ta trata e elekshon di dia 18 di april proksimo PNP ta bai hiba un kampanja positivo basa riba kontenido i no reakshoná mas riba e asuntu ku a okurí ku a resulta ku un eksponente a bai for di PNP apenas 2 dia prome ku entrega di lista. PNP ta haña si, ku ta su deber pa trese e informashon verídiko riba e partikularidat aki pa pueblo kompronde e otro banda di e medaya i pa kada ken mes por saka nan mes konklushon.
Partido Nashonal di Pueblo (PNP) for di aña pasa despues di elekshon di 5 òktober 2016, a kuminsá ku preparashonan pa restrukturá e partido, ku e meta di drenta e aña kaminda e partido ta kumpli 70 aña ku un bachi nobo nobo.
En konekshon ku e trayekto aki, direktiva di PNP a instalá un komishon di bon servisio kaminda a kuminsá evaluá pasado i presente pa asina fiha e partido su futuro. Tambe a papia ku diferente hende (miembro i no miembro) pa sa nan pensamentunan i ki direkshon nan ke pa e partido bai. Un petishon spesífiko tabata pa bin ku un plan di formashon polítiko pa e miembronan pa fortifiká e miembronan pa asina ei nan tambe por aportá mas ainda na e partido.
E restrukturashon ku a keda inisia ta konta pa Partido Nashonal di Pueblo den su totalidat. Pues ta e intenshon pa restruktura I fortifika tur organonan di PNP. Esaki ta konta pa e lider polítiko, direktiva, komishon die hende muhe , komishon di hubentut, komishondi konsulta i tambe miembresia.
Pa ta ser mas eksakto e proseso ariba menshoná ta kubri tambe e trayekto pa yega na un lider polítiko nobo. Mester bisa aki ku los for di e trayekto aki, e aktual lider polítiko di PNP ya kaba a aserka direktiva den un reunion despues di ultimo elekshon pa anunsiá ku mester kuminsá lihé ku un proseso demokrátiko i transparente pa yega na un lider polítiko nobo. Miéntras tantu ku e trayekto ta kana su persona logikamente lo e keda fungi komo lider politico. E intenshon ta pa e lider aktual hasi traspaso manera mester ta, na un manera ordená pa asina por guia e lider nobo pa e por kue eksperensia. Un trayekto ku direktiva den su totalidat a bai di akuerdo kuné.
E komishon di bon servisio a kaba den e promé luna di e aña aki ku nan trabou i a entrega e rapòrt konserní na direktiva. Rápidamente despues di e sak’i tabata tin algun suseso no espera ku a tuma lugá riba e arena polítiko na Kòrsou tras di otro ku a bin kaba den un desishon di gobièrnu (Gabinete Koeiman) dia 12 di febrüari 2017, pa disolvé Parlamento i yama elekshon nobo pa 28 di aprel benidero.
Den e siguiente reunionnan di direktiva di PNP, direktiva a bai di akuerdo, konforme artíkulo 14 bou di h di e statuto di PNP ku e lider polítiko aktual lo ta e kabesante di e lista di PNP pa e elekshon di 28 aprel próksimo.
E desishon aki a wòrdu anunsiá formalmente na tur parlamentario nan i ministernan den funshon pa PNP, ku ya kaba tabata di akuerdo ku e lider polítiko aktual lo a lidera e lista pa elekshon benidero.
Den un siguiente reunion di direktiva ku tabata dia 2 di mart 2017 direktiva a risibí un karta di 15 miembro (firmante) ku ta pidi un reunion general ku e tópiko kabesante di e lista di elekshon 2017. Basa riba e karta aki direktiva a tuma un desishon ku un komishon lo bai sinta papia ku e grupo pa sa kiko presisamente ta e propósito i tambe informa nan kiko tabata e desishon di direktiva riba e punto aki ku ya kaba a wòrdu akordá. Mester bisa aki ku e grupo entre tantu a bira ménos paso no ta tur hende a haña splikashon eksakto di e kontenido i e meta di e karta (di e grupo di 15) i esakinan a distansia nan mes for di e karta despues.
Den e reunion aki a yega na e palabrashon ku e komishon ku a sinta ku e firmantenan mester a bai bek direktiva i splika e inkietut nan i deseo nan di e grupo aki. No opstante e palabrashon aki dia 5 di mart 2017 un konvokashon a wòrdu saka pa un reunion di miembresia pa dia 7 mart 2017 ku e úniko punto di agènda ku ta desishon riba kabes di lista PNP pa e próksimo elekshon.
Den e siguiente reunion di direktiva, pa diskutí e konvokashon aki, a sali lo siguiente:
• E konvokashon ku a sali no ta konforme artíkulo 33 insiso 2 di statuto PNP. Lo mester tin 4 dia entre e konvokashon i e reunion.
• Tambe direktiva ta di opinion ku e punto di agènda ku ke wòrdu diskutí “ken ta enkabesá lista di elekshon 28 di aprel próksimo” sigun artíkulo 14 bou di h di e statuto PNP ta netamente tarea i prerogativa di direktiva pa disidí i no di membresia general.
• Tambe direktiva a konstatá ku e komishon di bon servisio a indiká ku e lista di miembresia di PNP no ta aktualisá i ta den revishon. Esaki ta buta ku lo por tin konsekuensia hurídiko na momentu ku tuma desishon den e diferente órganonan di partido.
• Tambe direktiva ta di opinion ku no sin mas asina por kanselá e programa di formashon polítiko ku e komishon menshoná ta enkargá kuné ya ku direktiva mes a aprobá e kalendario di e aktividatnan formativo aki kaba.
Esaki nan a buta direktiva yega na e desishon i konklushon ku lo mester para e reunion di miembresia ku a wòrdu konvoká pa 7 mart 2017.
Direktiva ke enfatisá ku loke e la menshoná ariba ta duna un bista kla kon e proseso di reorganisashon a inisiá i a kana i tambe direktiva ta mustra ku e proseso di yega na un lista balansa pa bai elekshon 2017 a kana di un manera harmonioso i transparente pa tur hende.
Tambe direktiva ke sigui bisa ku e trayekto ku a inisiá di reorganisashon lo sigui su kurso pa asina nos logra nos bachi nobo nobo sigur pa e 70 aniversario di Partido Nashonal di Pueblo.
Pa terminá partido ke ilustrá e echo ku e kousa di nos pais i e bienestar di nos komunidat ta semper na promé lugá. No tin espasio pa individualismo. Kolektividat i demokrasia ta base di funshonamentu den nos partido. Historia ta mustra ku esnan ku no por haña nan mes den e filosofia di kolektividat i demokrasia a bandoná partido i nan resultado nan ta papia pa nan mes. Pueblo lo tin sigur ku Partido Nashonal di pueblo lo sigui ku e trayekto di reorganisashon pa yega na un organisashon inovativo pa asina selebrá su 70 aña. Tur esaki paso Abo ta na promé lugá !
Klik Aki:
https://www.dropbox.com/s/enuip1y9309tumk/manifesto_pnp_maart2017_final.pdf?dl=0
https://www.dropbox.com/s/phnoa8r2hk7qkof/Print1_PNP_VishonFlyer-a5%20%281%29.pdf?dl=0
https://www.dropbox.com/s/pr9dmix4df639eo/Print2_PNP_VishonFlyer-a5.pdf?dl=0
