Gobièrnu di Grupo 12 mes ta kulpabel pa Alto Supervishon!

Gobièrnu di Grupo 12 mes ta kulpabel pa Alto Supervishon!

Garantia pa elekshon 28 di aprel na kaminda
Nos ta kontentu pa tuma nota di e komunikado di Konseho di Minister di Reino Hulandes (Rijksministerraad) den kua a anunsiá ku lo pidi konseho urgente di Raad van State, enkuanto posibel medidanan pa duna garantia na tur votadó di Kòrsou ku elekshon di 28 aprel próksimo lo wòrdu organisá na drechi. E medida di alto supervishon (algemene maatregel van rijksbestuur) aki lo inkluí saka organisashon di elekshon for di man di e e Gobièrnu anti-demokratiko, anti-pueblo di Grupo 12 i pone esaki bou di enkargo di Gobernador di Kòrsou komo instituto independiente for di polítika. Mas aleu, Gobièrnu di Reino a konfirmá ku e desishon di Gobernador pa nò firma e dekreto pa para elekshon di 28 aprel tabata un desishon korekto, komo ku esaki ta kontra lei i kontra prinsipionan di bon gobernashon. Esaki ta un paso importante pa logra salbaguardiá nos demokrasia i pa protehá e derechi fundamental di nos poblashon pa skohe su Parlamento den un elekshon liber i sekreto.
Tin mas medida di Alto Supervishon na kaminda?
Manera ariba menshoná, Gobièrnu di Reino a sostené nos Gobernador su desishon pa para un desishon di e Gobièrnu di Grupo 12, komo ku esaki no ta kumpli ku práktikanan di bon gobernashon. Manera ta konosí Gobièrnu di Reino tin e tarea pa vigilá i salbaguardiá bon gobernashon (deugdelijk bestuur) pa pueblo di Kòrsou.
A yega na nos konosementu ku tin polítikonan, ku por sierto (probablemente) lo no pasa screening, sintá den Fòrti dunando instrukshon nan Ministernan, bishitando Ministerionan i entidatnan di Gobièrnu manera NV i Fundashonnan dunando instrukshon i tambe planiando biahenan ofisial pa representá nos pais. Ademas, algun di nan ya a kuminsá menasá direktornan di NV i posiblemente miembronan di Hunta di Komisario ku nan lo wòrdu retirá ku no kumpli ku instrukshon di e polítikonan aki. Mas aleu, ya a yega na nos konosementu ku tumando desishonnan ‘op stuk’ komo akshonista ‘buiten de algemene vergadering van aandeelhouders (BAVA)’ pa kompanianan saka sèn pa e.o. ehekutá maneho deskabeyá di gobièrnu; sintando riba stul di Hunta di Komisario i gerensia. Esaki tambe ta kontra prinsipionan di bon gobernashon i ‘good corporate governance’. Ta e tipo di práktikanan aki a kousa ku 262 mion florin a disparsé for Refineria di Kòrsou i kasi a duna Aqualectra un sla mortal. (Rapòrt Willems). Esaki por nifiká ku den apénas algun siman di tempu tin otro ‘aanwijzing’ na kaminda manera a duna Gabinete Schotte a risibí na sèptèmber 2012. Esaki no solamente lo ta un bèrgwensa pa nos demokrasia i ta tacha nos outonomia, pero tambe lo por resultá mayan den mas medida i doló pa nos pueblo.
Gritunan di soberania i kolonialismo
Ya e mesun miembronan di e grupo anti-demokratiko, anti-pueblo aki a kuminsá lansa gritunan di pa nos para pa nos ‘nos soberania i kontra medidanan di Gobièrnu ‘Kolonial di Hulanda. Un atvertensia! No laga nos kai den trampa di e gritunan bashí aki. Tuma nota ku ta netamente e maneho anti-demokratiko, kontra lei i deskabeyá di e Gobièrnu aki ta yama medidanan di Alto Supervishon riba su mes. No ta Hulanda a tuma desishon kontra lei pa para elekshon di 28 aprel, ta e Grupo di 12 aki mes a anunsiá esaki promé ke e a sinta, komo su strategia pa keda na poder, sigui pa anunsio di Minister Presidènt Pisas ku a tuma desishon pa para elekshon i deklarashonnan di Minister Ribeiro ku lo posponé elekshon pa motibu di supuesto iregularidatnan ku e a topa (pa despues e desmentí esaki). Esaki sin duda ta un tristesa i un bèrgwensa pa Kòrsou i ta e Gobièrnu di Grupo 12 aki ta kulpabel, nò Hulanda.
Strategia pa yega na poder apsoluto
Manera ya nos alertá, si e Gobièrnu no logra di para elekshon, e lo trata di opstruí organisashon di elekshon i òf sabotiá e resultado di elekshon na su fabor. Ademas, ku lo usa e periodo kòrtiku ku e ta na poder pa kumpra sosten popular bou di nos pueblo ku maneho populista i deskabeyá; partiendo kos pa pueblo, usando reservanan di kompanianan di gobièrnu i fundashonnan, pero tambe fondonan manera Crime Fonds i Stichting Economische Ontwikkeling (SEO) ku ta destiná pa Korpodeko. E plan ta pa usa sèn di pueblo pa hasi polítika i kumpra voto p’asina keda na poder.
Tambe nos a atvertí ku e Grupo di 12, asistí pa un grupo di abogado, ta buskando un konfrontashon ku Gobernador i Reino pa lanta emoshonnan robes bou di nos pueblo kontra un supuesto gobièrnu kolonial. E meta ya ta konosí. E grupo aki ke logra, pa medio di un referèndem, independensia di Kòrsou. Klaro ku independensia no ta nada malu riba su mes i den un demokrasia manera di nos, mester respetá esnan ku tin deseo pa un dia Kòrsou bira independiente.
Loke nos ta alertá, ta e motibu pakiko e grupo aki ke logra independensia mas lihé posibel. Esaki pa motibu ku Gobièrnu di Reino Hulandes, i su tarea a base di nos Statüt pa garantisá demokrasia, bon gobernashon, kumplimentu ku lei i nos derechinan (rechtszekerheid), ta forma un estorbo pa e Grupo di 12 logra su metanan. Esta (1) pa sosionan di krímen organisá apoderá di Gobièrnu, (2) logra poder apsoluto òf diktadura kaminda e Grupo aki den tur poder den nan man .. pa nan hasi manera nan ke, (3) evitá ku un òf mas polítiko ku ta forma parti di e Grupo aki ta sinta sentensia of lo bai será.
Den e kuadro aki, apesar ku Alto Supervishon di Gobièrnu di Reino ta un bèrgwensa pa Kòrsou, e ta nesesario pa salbaguardiá nos demokrasia, nos outonomia i dignidat di nos pueblo.

This site uses Akismet to reduce spam. Learn how your comment data is processed.

%d bloggers like this: