Deliberashon ku Gobièrnu enkuanto iregularidatnan den organisashon di elekshon i asina fayando ku artíkulonan di Lei Elektoral (Kiesreglement Curaçao).

Na: Presidente di Parlamento di Curaçao
Sr. Amerigo Thode
Wilhelminaplein # 4
Curaçao.

Willemstad, 31 di mart 2017

Tópiko: Deliberashon ku Gobièrnu enkuanto iregularidatnan den organisashon di elekshon i asina fayando ku artíkulonan di Lei Elektoral (Kiesreglement Curaçao).

Sr. Presidente,

Suskritonan ta hasi un yamada urgente na bo persona pa konvoká un reunion relámpago pa deliberá riba un posibel medida di alto supervishon ku ta na kaminda pa garantisá ku e elekshon di dia 28 di aprel ta sigui.
Frakshon di PAR a sigui e desaroyonan i a tuma nota ku e minister enkargá ku Asuntunan di Reino, sr. Plasterk, den un reunion di Konseho di Ministernan di Reino (RMR) resientemente a proponé e órgano menshoná pa aserka Konseho di Estado (Raad van State) pa un konseho urgente pa garantisá ku e elekshon di 28 di aprel próksimo por tuma lugá di un forma ordená. Tambe frakshon di PAR a tuma nota ku a proponé un medida di alto supervishon pa duna e outorisashon na Gobernador di Kòrsou e enkargo nesesario pa e organisashon di e elekshon benidero na Kòrsou.

Frakshon di PAR for di prinsipio den tur reunion despues ku a anunsiá elekshon di dia 28 di aprel 2017, a bin ta splika ku e elekshon ta legalmente yama i irevokabel. Pero insistentemente un grupo di Parlamentario a aktua kontra di lei pa konsientemente yama un medida di alto supervishon.

Frakshon di PAR ku bastante asombro, konsternashon i deskonsertá a tuma nota ku e gobièrnu interino ku a tuma asiento riba djabièrnè 24 di mart 2017, ya den solo un siman a sòru pa un debakel den Reino. Gobièrnu a aseptá e enkargo di Gobernador pa organisá e elekshon di dia 28 di aprel próksimo i alabes kaba di atendé asuntunan koriente (lopende zaken), pa direktamente despues di asumí enkargo reuní i tuma desishon kontrali di palabrashon i lei, pa para e elekshon benidero. Den e mesun rosea Gabinete Pisas a anunsiá ku a posponé elekshon te momento ku korte Supremo Oropeo pa Derechinan Humano tuma un desishon riba e karta ku gobièrnu transitorio aparentemente a manda pa para elekshon.
Komo si fuera no ta basta gabinete Pisas a tuma e kurashi pa subi trapi di Gobernador i poné bou di preshon pa e firma e un Landsbesluit nobo pa revoká e Landsbesluit di 12 di febrüari 2017, no 17/0223 den kua a anunsiá elekshon di dia 28 di aprel 2017.

Pa kolmo a sigui riba e trayekto di sera boka di pueblo riba 28 di aprel 2017, dor di duna enkargo na Konseho Supremo Elektoral (KSE) pa inmediatamente para tur
akshon ku tin di aber ku elekshon ku forsa retro-aktivo i a duna enkargo na Kranshi pa di ningun forma koperá ku KSE pa hasi e elekshon benidero posibel. Di e forma aki kier a keda mina derechi di e votadó!

Siguiendo riba e trayekto di sera boka di pueblo dia 28 di aprel próksimo a yama un reunion públiko, un luna promé, esta dia 28 di mart 2017 ku e punto di agènda:

Deliberashon ku Gobièrnu enkuanto iregularidatnan den organisashon di elekshon i asina fayando ku artíkulonan di Lei Elektoral (Kiesreglement Curaçao), kaminda Gabinete Pisas a mustra riba e “fayonan” den nos Reglamento di Elekshon. Sr. Ribeiro, hurista, i alabes e aktual minister enkargá ku BPD a splika ekstensivamente diferente “fayo i inkumplimentu” pakiko no por tin elekshon dia 28 di aprel 2017.
Apénas e reunion di djamars dia 28 di mart a terminá, ku djaweps 30 di mart 2017 a yama un reunion públiko ku karakter di urgensia bou di e título: Deliberashon ku Gobièrnu enkuanto desishonnan di Parlamento relashoná ku elekshon dia 28 di aprel 2017, kaminda tabatin ménos ku dos ora di espasio pa Parlamentarionan por prepará i akudí, kaminda sorprendente a pasa un moshon den kua ta disidí ku elekshon ta kontinuá.
Ta resultá awor ku pa e motibu ku a violá regla tras di regla, gobièrnu di Reino tin ku intervení konforme artíkulo 43 di nos Statüt.
Frakshon di PAR ta lamentá i kondena e aktitut perverso aki di Gabinete Pisas, ku un biaha mas a mustra di no ta basilá pa violá kualke un di nos leinan konstitushonal.

Frakshon di PAR ta solisitá un reunion ku karakter urgensia pa deliberá tokante di e posibel medidanan di alto supervishon ku ta na kaminda i ku probablemente ta e kousa pakiko formador i eks-minister Larmonie-Cecilia, hurista, i ku e enkargo pa a organisá elekshon, sa ku ela violá tur regla i lei i hiba e gabinete Pisas den otro debakel históriko pa nos pais Kòrsou. Ta ku kua konfiansa por stens riba Gabinete Pisas?

Sperando ku bo ta kumpli debidamente ku bo enkargo komo Presidente, nos ta keda pendiente

Drs. Marilyn Alcalá-Wallé

Dhr. Curtley Obispo

Dhr. Stephen Walroud

This site uses Akismet to reduce spam. Learn how your comment data is processed.

%d bloggers like this: