Ta basta hasi polítika ku nos futuro generashon
Ta basta hasi polítika ku nos futuro generashon
Mi a tuma nota di e komunikado di Fundashon pa Finansiamentu di Estudio (SSC) den kual ta informá ku si no risibí mas supsidio di Gobièrnu, lo no por akomodá e 240 studiantenan ku a apliká pa studia den region pa e aña eskolar 2017-2018. Ta komprendibel ku esaki awe ta trese hopi duda serka studiante i mayornan.
Konsientemente algun polítiko ta skohe pa hasi polítika ku e informashon en bes di proponé solushon. Mi ta konsiente ku un presupuesto ta wòrdu aprobá adelantá, i ku pa un rason òf otro no a tene kuenta ku e supsidio nesesario pa nos studiantenan por sigui studia den region e aña benidero. Di otro banda, Gobièrnu na turno por aktua i asina yuda nos hóbennan ku ta futuro di e pais aki.
En bes di malgastá plaka di pueblo ku fiesta riba tur plenchi di Kòrsou, ban pone sèn pa studiantenan por studia den region. E minister di enseñansa aktual mester duna e punto aki prioridat i regla pa asina e studiante por drenta su periodo di èksamen trankil, sabiendo ku su plannan pa estudio no ta un problema.
Mester tene kuenta ku ta for di novèmber/desèmber un studiante ta planea i disidí unda e kier kontinuá su estudio i pa bai den region esaki ta enserá traha diferente tèst pa por purba drenta e universidatnan di eskoho.
Ta di gran importansia pa e Gobièrnu di turno tuma un desishon pa ku e 2.5 mion ku falta pa kompletá e 4 mion. Sea ta pa medio di un presupuesto supletorio òf for di un otro post. Punto ta ku mester atendé ku e supsidio aki lihé.
Mi kier sugerí SSC pa revisá su maneho, mirando ku tur aña di nobo un kantidat di studiante ta sigui apliká pa bai studia den region. Ta via e plan di maneho di SSC mester sòru pa mantené esaki posibel i si ta nesesario, kisas mester kòrta na otro kaminda.
Ehèmpelnan manera esaki ta netamente e motibu dikon mi a djòin partido PIN, ku ta para pa entre otro inovashon den enseñansa. Mi ta kere ku lo mester yega un kaminda ku no ta solamente e supsidio di Gobièrnu ta kubri e gastunan, pero mester yega na generá fondo, dor di kambia kisas e konsepto di enseñansa liber, i por ehèmpel laga esun ku por paga of kontribuí ku un fondo i asina yuda baha gastu den enseñansa.
Mi ta spera ku e Gobièrnu na turno lo karga su responsabilidat i yega na un solushon enkuanto e studiamentu den region dentro di 2 siman, ya asina por trankilisá nos studiantenan i mayornan den e periodo asina importante pa nan.
