‘X-DOW LO POR BIRA OFICINA PA A.T.A. COMBINA CU UN MUSEUM HISTORICO/CULTURAL ‘ !

BENNY NISBET(PPA)
‘X-DOW LO POR BIRA OFICINA PA A.T.A. COMBINA CU UN MUSEUM HISTORICO/CULTURAL ‘ !
Tin un storia pa worde presenta, conta, projecta ….di e historia/producto/destinacion Aruba !!
Pa un periodo kaba e x-DOW ta para bashi y cera cu ‘plywood’ pa evita vandalismo. Un Edificio grandi cu a hunga un rol importante den desaroyo di nos pais siendo nos x D.O.W. E pregunta ta kiko lo mester bira e destino di e edificio grandi aki situa na un sitio strategico.
Algun siman pasa den nan esfuerzo di logra ‘Finanzas’ pa sera presupuesto di pais Aruba gobierno a anuncia cu nan a propone na Aruba Tourism Authority (ATA) pa nan cumpra e edificio aki for di gobierno drechele y funciona den futuro for di e sitio aki cu lo ta strategico pa un A.T.A. ! Te na e momento aki nos no por a comprende cu si ATA a contesta of a declara cu nan lo ejecuta e plan aki …no kabe duda cu nan ta studiando esaki internamente.
PPA como organisacion politico cu ta preparando pa nos participa na e proximo encuentro Democratico(eleccion 2017) tambe a repasa e posibilidadnan aki den nos seno ….preparando nos ‘Masterplan pa desaroyo di Oranjestad nos Capital’. Esaki ta tuma lugar den nos ‘ThinkTank’ cual ta nos miembronan di conseho di partido expande pa diferente ciudadano/experto cu ta participa na momento cu nan por duna un contribuicion na nos vision. Den e cuadra aki a worde senjala cu Aruba/Oranjestad su Museumnan no ta duna un refleha completo di e desaroyo historico/cultural den cual Aruba y Oranjestad a pasa den. Esaki cu tur respet pa e museumnan existente.
PPA ta di opinion cu ora un pais of isla kier projecta su mes…..e projeccion aki lo mester refleha e historia di e pais aki den e sentido mas amplio cu ta posibel. Ta e storia completo di e pais ey ta locual ta bira e producto cu mester worde bendi cu nos bishitante. Den e cuadra aki PPA ta di opinion cu Aruba mester di un Edificio mucho mas amplio cu por worde desaroya como MUSEUM HISTORICO/CULTURAL di nos pais. Ta den e discussion aki den seno di nos ‘ThinkTank’ PPA su vista a cai riba e edificio di ex DOW..situa na un sitio ‘strategico’ dilanti nos haf cu awor ta worde destina completamente pa nos Cruise turismo.
Ta den e cuadra aki PPA tabata di bai propone na e actual gobierno pa reserva e edificio aki pa un ‘Museum Historico/cultural’ den e sentido mas amplio posibel. Y mientras cu nos tabata na e punto di publica nos conclusion gobierno cu pa anjas a keda den un silencio hermetico di cu plannan pa e edificio y den cuadra di e crisis financiero di nos actual gobierno…derrepiente a anuncia su intencion pa bende ATA e edificio aki. Esaki a pone cu PPA a bai bek den nos ‘ThinkTank’ pa discuti esaki un vez mas. Repasando e espacio di ex DOW cu hende cu a traja den djele…nos a jega na e conclusion cu;
1. Tin espacio pa un A.T.A. por funciona debidamente !
2. Eventualmente cu e parti di ‘Cruisetourism’ tambe !
3. Pero segun nos por lo pronto tambe lo tin suficiente espacio ainda pa destina na un otro departamento y/of projecto y den e cuadra aki PPA ta propone pa un ‘Museum Historico/Cultural’ cu atencion tambe pa desaroyo y historia di nos Industria di Turismo tambe.
Den e concepto di un Museum Historico/Cultural PPA ta pone e accento den uno ‘mas amplio cu ta posibel’….’there are many chapters to be presented & explained’…….E capitulo historico cultural di desaroyo di Aruba en general………di Oranjestad en particular…….un capitulo dedica na e crecemento di comercio riba nos Isla….na e rol y contribuiccion di e famianan arubiano, caribense, judieuw, libanees, hindoe, di kada grupo cu a establece nan mes riba nos Isla ‘tin un story to be tolled’…well ban UNI pa hasi e Museum Historico Cultural bira un realidad pa asina e ‘chapters/stories’ aki por worde conta y projecta. Ta tur esaki ta crea e producto/destinacion historico Aruba !!
• E historia di un aruba simpel na unda un par di famia Indjan tabata biba !!
• E historia di un asina jama jegada di e spanjo enbusca di rikeza !!
• E historia di un jegada di esnan di Holland(W.I.C.) cu despues a bira Hulanda !!
• E historia y influencia di tur esaki riba nos pueblo humilde …..!!
• E historia di con musica e cuminsa jega nos Isla….y cu tabata worde toca….iniciando cu e musica di Tamboe ….di cual por worde presenta un storia riba su mes cu e rol di famia di e tempo ey rond di Aruba pero especialmente den Madiki y Brazil cu a tene ‘Tamboe’ na bida …!! Con a worde introduci belasting pa tocamento di ‘Tamboe’ por a worde toca den playa…cu consecuencia cu Tamboe a worde teni na bida den kunuku etc etc…. Tin un storia pa worde conta ….!!
• E historia di un ‘rancho’ y su famianan y nan forma di biba …!
• E historia di un ‘Sta Cruz’ y su famianan ……….
• E historia di un ‘Savaneta’ y su famianan…….
• E historia di Noord y su famianan……
• E historia/presentacion di un kamber den e Museum dedica na nos ‘Commandeurnan’ den nos historia….
• E historia/presentacion di un kamber den e Museum dedica na nos ‘Gezaghebbernan’ den nos historia…
• E historia/presentacion di un kamber dedic na nos ultimo Gobernadornan di pais Aruba.
Y asina PPA por continua…..
• E historia/presentacion di e desaroyo di e ‘bunkerstation’ despues refineria na San Nicolas…..
• E historia/presentacion di nos turismo na un forma jamas visto…..
• E historia/presentacion di Musica arubiano den curso di anjanan y musico cu Todopoderoso a tuma nan pero nan a larga nan ‘stempel’ ….Nan tabata y ta Aruba ….y ta keda na nos generacion pa presenta e TOTALIDAD di nos historia ……
Den un projecto cu PPA ta jama ‘Museum Historico/Cultural’ di Aruba den tur su epoca…
Un Museum cu nos bishitante lo para den rij pa nan drenta y lo sali cu e pregunta den nan mente con un Isla chikito asina por projecta un historia amplio y briljante asina…..esey lo hasi Aruba ainda mas atractivo.
E projecto aki ta parti di e ‘vision di PPA’ pa eleva nos pais ‘Aruba .. pa e Proximo Nivel’ cu sosten di nos pais. Sperando cu e articulo aki ta duna basta informacion di e trabaonan grandi cu ta tumando lugar den seno di partido PPA ‘E Forza Independiente’ di nos Pais.

Aruba, 3 april 2017 Lider Politico di PPA
BENNY NISBET

This site uses Akismet to reduce spam. Learn how your comment data is processed.

error: Content is protected !!
%d bloggers like this: