CARIFTA GAMES E OPORTUNIDAT DI ORO PA KORSOU.

April 7, 2017 REDAKSHON 0 Comments

Amigu i of amiga ku sa lesa mi, s.v.p kompartí e siguiente mensahe kòrtiku di mi ku e otro kompatriotanan.
Un evento deportivo ku realmente tur potensial pa duna realse na e nòmber di Kòrsou den Karibe, anto ku lo a enserá presentashon di nos isla riba un teblachi, komo un destino interesante i atraktivo den tur sentido di palabra! Nèchi infrastruktura, Punda i Otrobanda ku su brùg di ponton úniko, edifisionan históriko, nos haf ku su Laman Chikí “Waaigat”, naturalesa impreshonante, playanan bunita. Pero ruman, lo mester tabatin un eskoho konsientemente hasí adelantá, serando kabesnan huntu komo pueblo, anto definitivamente pa sali padilanti, maske ta promé biaha den nos historia. Kreando e sentido di kompromiso ku huntu nos intenshonalmente lo bai pe, grandi i chikitu, riku i pober, pretu i blanku, studiante i penshonado, komersiante i suidadano komun i koriente! Aki nos lo a djòin huntu den esfuersonan pa laga nos isla resaltá. Síííí, nos tur ku e mesun lokura!!!! Por lo ménos un siman largu di 11 pa 18 di aprel 2017, hasiendo uzo di e ambiente di atletismo! Outomátikamente lo a nifiká ku nos sentro di suidat Punda i Otrobanda lo ta repleto di turistanan for di islanan di Karibe, iluminá i dekorá tremendamente, benta di suvenir na gran eskala, ambiente hospitalario reflehá pa un tremendo servisio den tienda, pakus, hotèl i nos terasanan yen di ambiente, kompañá pa nos dushi músika. Pero, promé lo mester tabatin yamadanan profundo na pueblo di Kòrsou i hinter Karibe pa bin bishitá nos i yena nos kayanan! Awe sinembargo ata nos den un ambiente polítiko gubernamental mas desastroso ku nunka. E esfera di konflikto di forma eterno ankrá of derá den nos DNA. T’esei a skohe pe finalmente: “Ban sigui bringa ku otro numa, lubidando ku bida no ta warda riba nos!” Ken por bisa ami ku CARIFTA GAMES lo no por tabata muchu mas atraktivo i ku efektonan alentador??? Kòrsou mi ta sigui karga e speransa ku un dia nos lo yega!!! ERWIN RAPHAELA.