MAN TA PARA TRAS DI YAEL PLET

MAN TA PARA TRAS DI YAEL PLET

Awe den medianan sosial i tambe den medionan di prensa a sali un karta ku Sr. Yael Plet a firma pa Sr. G. Ricardo. E karta ta indiká ku Sr. Plet ta deklará ku no ta Sr. Ricardo ta e persona ku a purba di sobornele, lokual ta korekto i ya ta konosí pa basta tempu serka MAN. E kontenido di e karta pa e motibu ei ta korekto i MAN ta para tras di Yael Plet. Niun momento so Yael Plet no a bisa un mentira den e asuntu aki anto na nòmber di Yael Plet partido MAN ta deklará ku e no ta bula waya. E hecho ku outoridatnan a drenta den kas di Sr. Ricardo den forma di un entrada hudisial, no ta den man di Yael Plet ni di partido MAN. Esei ta prerogativo di e outoridatnan konserniente ku a hasi esaki. Pa por hasi un entrada hudisial e outoridatnan mester haña e pèrmit nesesario di un hues komisario pa por hasi esaki. Un hues komisario lo no duna e posibilidat di un entrada hudisial si no tin motibunan manera lei ta preskribí pa hasi esaki. Partido Man ta enfatisá ku Ministerio Públiko mes a indiká ku banda di e denunsia di Yael Plet kaminda ta papia di un intento di soborno, tambe tin un kaso di soborno ku Ministerio Públiko ta atendiendo na mesun momento. Ministerio Públiko no a indiká ta pa kua di e dos kasonan a hasi entrada hudisial na kas di Sr. Ricardo. Banda di esei naturalmente por tin yen di otro motibu ku no ta konosí ahinda pakiko a tene un entrada hudisial na kas di Sr. Ricardo, ku no tin nada di haber ni ku Sr. Yael Plet, ni ku partido MAN. Mirando e hecho ku e kasonan di soborno aki ta andando i outoridatnan ta aktuando, Sr. Yael Plet den su kalidat di parlamentario i partido Man den su kalidat di un partido polítiko, mester abstené nan mes di duna mas komentario ku esaki tokante di e kaso. Ta na e outoridatnan pa aktua den e kaso aki i partido MAN ta pidi un i tur pa duna e outoridatnan e espasio nesesario pa hasi nan trabou. Pa pregunta riba e tópiko aki, por tuma kontakto ku abogado di sr. Yael Plet, mr. Achim K.E. Henriquez.

Direktiva di MAN