Promé reakshon riba Rapòrt reunion Staten 4 yanüari 2017

Promé reakshon riba Rapòrt reunion Staten 4 yanüari 2017
Willemstad – Despues di e suseso den e reunion di Staten di dia 4 yanüari 2017, e Minister di Hustisia a keda enkargá ku e petishon pa investigá pa sa ta kiko a bai robes den e aktuashon di polis ku a buta tur hende ku tabata den e reunion ei na peliger. Pues e komishon e keda instalá pa investigá e akontesimentunan relashoná ku e manera ku polis a aktua en reakshon ku e petishon di e presidente di parlamento pa e mal komportashon di algun miembro di parlamento. E investigashon aki tabata tambe netamente pa evitá ku algu asina aki lo por bolbe sosodé. Lamentablemente e la bolbe sosodé kaminda un miembro a agredí un otro algun siman despues di e reunion di 4 yanüari 2017. Pa e motibu aki e komishon a konsistí di dos eks polis i un eks hues, pensando ku nan konosé e materia relashoná ku funshonamentu di polis. Sinembargo nan a sigui i duna komentario tokante funshonamentu di parlamento lokual ta trese hinter e rapòrt den duda.
Esaki ta di lamentá paso mi a wòrdu informá di e minister di hustisia saliente ku niun ora so e tarea na e komishon no tabata pa investigá (proseduranan) parlamento. Esaki lo no tabata por tampoko paso un investigashon di parlamento no ta kai bou di e responsabilidat di e minister aki tampoko. Na di dos lugá si esaki tabata e intenshon anto lo a pidi eksperto riba e materia ei pa hasi e investigashon i no e tres persona nan ei.
Bo por mira klaramente ku e falta di eksperensia riba e aria aki a influensia e trayekto pa yega na un konklushon ophetivo i ku ta kuadra ku parlamento su realidat. Mi tin di bisa ku pa bon funshonamentu di kualke organisashon i tambe parlamento ta stipulá regla i ta spera ku e partisipante nan ta tene nan mes na e reglanan aki i tambe mester tin un bon komportashon. Pa sòru ku e reglanan ta keda biba i tambe ku bon kondukta ta keda demostrá ta skohe un presidente di parlamento.
Komo un presidente responsabel, mirando ku e reunion en kuestion lo tabata unu importantísimo i desisivo, mi a asumí mi responsabilidat pa salbaguardiá nos demokrasia i tuma algun desishon previo na e reunion aki. Un di nan tabata di pidi refuerso adishonal di polis pa asina evitá kualke disturbio den sala i/o den tribuna, ku por tin.
Na inisio di e reunion en kuestion konforme e lista di presensia (presentielijst) mi a tuma nota ku tabata tin quorum amplio pa e motibu aki a sigui pa habri e reunion konforme regla i segun prosedura i a pasa pa trata e punto nan di agènda. Konforme regla mi a nombra un komishon pa revisá e kredensialnan di e parlamentarionan skohé pa pueblo ku mester a drenta parlamento. Durante ku mi tabata na palabra, un miembro tabata interumpiendo mi gritando “voorzitter” i despues e la kuminsá papia. Na e momento ei mi a reakshoná bisando e miembro ku e no tin palabra. Esaki konforme artíkulo 71 insiso 1 tambe artíkulo 7 bou di punto d. kual ta bisa ku ta e presidente ta esun ku ta duna palabra anto ku e miembro ta haña palabra ora ku su petishon wòrdu honra dor di e presidente. Tanten esaki no sosodé e miembro no tin palabra i no por hasi niun petishon.
Pa terminá mester bisa ku e komishon (Wiel) konserní a tende ami komo e promé hende anto na niun momento mi a wòrdu buta na altura ku lo investigá parlamento, pero tambe mi no a duna enkargo na niun momento tampoko pa hasi esaki. Tambe lo mi por bisa ku e komishon aki no a tene kuenta sufisiente ku e reglamentu di órden di parlamento. Mi ta lamentá ku e komishon sin ku a haña e splikashon i sin ku ta eksperto riba e tereno aki ta yega riba nan mes na konklushonnan eróneo. E sak’i ta buta ku henter e rapòrt ta bira dudoso.

This site uses Akismet to reduce spam. Learn how your comment data is processed.

error: Content is protected !!
%d bloggers like this: