PAR: sra. Marilyn Alcalá-Wallé ke mas klaridat riba e funshonamentu di e vigilansia di video Inspur en konekshon ku seguridat públiko.
Presidente di Parlamento
Sr. A. Thode
Wilhelminaplein # 4
Curaçao.
Willemstad, 10 aprel 2017
Suskrito a tuma nota di e konvokashon pa asistí na un reunion ku lidernan di frakshon den Parlamento riba djaluna 10 di aprel, 2017, pa 2 or p.m. Esaki konforme artíkulo 11 nos Reglamento di Orden ku ta stipulá ku tin un kolegio di Seniornan.
Tumando nota di e tópiko, esta: deliberashon ku minister di hustisia tokante e “strong room” kaminda tur e kameranan “inspur” ta wòrdu vigilá, suskrito ta partisipá na bo persona ku e no ta mira e motibu pa tene tal reunion di Seniornan.
Di e otro banda sinembargo, suskrito ta sinti e nesesidat pa haña mas klaridat tokante e funshonamentu di e vigilansia di video en konekshon ku seguridat públiko. Esei ta pone ku suskrito ta hasi un petishon pa konforme artíkulo 57 di e Areglo di Estado di Kòrsou, ku ta indiká ku e ministernan ta duna e informashon deseá di forma oral o por eskrito na un òf mas miembro di Parlamento i alabes teniendo kuenta ku artíkulo 96 di e Reglamento di Orden di Parlamento, manda e karta aki pa e Minister ku ta enkargá ku Hustisia pa duna kontesta riba e preguntanan.
Tratando e tema di e forma aki, suskrito por garantisá ku e no ta forma parti di un reunion kaminda por tin violashon di e obligashon di sekresía (geheimhoudingsplicht) di parti di un òf mas miembro di Parlamento iresponsabel, transmitiendo informashon delikado na un òf mas emisora.
Drs. Marilyn Alcalá-Wallé
Lider di Frakshon di PAR den Parlamento di Kòrsou