E yu-di-Kòrsou nobo mester ta rebelde!

E yu-di-Kòrsou nobo mester ta rebelde!

Komo hóbennan, trahando den e sektor di enseñansa,“youngprofessionals”, patriota i agentenan di emansipashon, nos no por laga esaki tambe pasa bai sin bisa nada. Ta un lástima ku ketu bai tin persona eksperensiá i studiá den nos komunidat ku ta bisa di ta stima Kòrsou i ku nan ta traha na su adelanto, i tòg ta uza e strategia pa manipulá i malinformá!.
Kiko ta independensia? Independensia ta ora un pais òf nashon no ta wòrdu dirigí dor di un otro pais, e mes por disidí totalmente riba tur su asuntunan di pais interno i eksterno. Independensia ta konkretamente ora otro paisnan ta rekonosébo komo estado independiente. Segun tratadonan internashonal tur pueblo rònt mundu tin derechi riba nan outonomia.
Pa nos di Kousa Promé ta inakseptabel ku ta keda mancha i trapa e derechi fundamental akí di pueblo di Kòrsou. Ta opvio ku lo mester kambia e rumbo preokupante ku Kòrsou ta bai aktualmente.
Kousa Promé, for di su inisio na 2012 a proklamá mediante Akademia Popular ErrolScoop, ku pa solushoná e problemanan den nos sosiedat strukturalmente, tin ku traha pa yega na un yu-di-Kòrsou nobo. I ta netamente den e liña di pensamentu akí Kousa Promé a bin ta traha i lo sigui traha tambe. Pa un dia Kòrsou yega na un otro status. Kousa Promé ta konsiente ku ta pueblo so por disidí esaki i no esnan ku ta dirigié. Riba Kòrsou ya un gran mayoria a pèrdè tur noshon pa loke ta norma, balor, desensia i òrdu i ta hustamente pa e motibunan akí Kousa Promé ta boga pa e yu-di-Kòrsou nobo.
E yu-di-Kòrsou nobo mester ta “rebelde”. Ta nos deber pa sigui e lucha sagrado heredá, pa eksigí rèspèt i libertat.E lucha heredá di indigenonan kurasoleño ku a lucha kontra invasornan spañó, katibunan kurasoleño ku a lucha kontra e kolonisadó ulandes, héroe i baluartenan manera entre otro Tula, Pedro Luis Brion, Carel Manuel Piar, Felis Chakuto, Wilson‘Papa’Godett, FrankMartinusArion i ErrolScoop, ku a eksigí libertat i rèspèt.Nos mester traha konsientemente riba un yu di Kòrsou emansipá, e yu-di-Kòrsounobo.Mester lucha pa konkistá nos identidat.
Ora nos ta papia di e yu-di-Kòrsou nobo Kousa Promé kemen: yunan di Kòrsou ku a base di esfuerso propio, trabou duru, trabou konhunto, estudio i formashon boluntario i formal a alkansá un nivel di pensa i anda ehemplar i positivo. Un persona ku tin rèspèt pa bida humano. Rèspèt pa tur persona di otro desendensia, otro religion, otro opinion, otro spesialismo, otro pensamentu, otro forma di biba i bida for di esun di dje. Un persona ku por biba den harmonia ku naturalesa i medio ambiente i ku tin apresio pa famia i relashonnan familiar.
E yu-di-Kòrsou nobo ku nos ke alkansá tin ku duna balornan manera union, rèspèt, toleransia i koperashon un lugá sentral den bida. Otro elemento importante ku e yu-di-Kòrsou nobo mester tin ta rèspèt pa herensia kultural, kultura i naturalesa, kerensia i kustumber. E ta akseptá i respetá tur otro yu di Kòrsou di tur desendensia i ta dispuesto pa uni pa adelanto di Kòrsou. E yu-di-Kòrsou nobo ta rechasá mentalidat di kangreu i tin orguyo propio, konfiansa den su mes, konfiansa den su pais i konfiansa den e futuro di Kòrsou. E mester tin apresio i rèspèt pa hende grandi komo portadó di konosementu di pasado i komo esun ku tin ku duna e punt’é kabuya bieu pa na dje konopá e nobo.
E yu-di-Kòrsou nobo ta dispuesto pa reklamá su derechi riba su historia, su presente i su futuro. E yu-di-Kòrsou nobo ta dispuesto pa rekonkistá su pais, Kòrsou. Ta e yu-di-Kòrsou nobo akí so por solushoná e situashon di Kòrsou. E ta esun ku realmente ta orguyoso i ta stima Kòrsou for di profundo di su kurason. Kousa Promé ta invitábo ban p’e yu-di-Kòrsou nobo.
Pasobra gobernashon di Kòrsou POR OTRO.

Giselle Inees-Rosalia
Relashonista Públiko Kousa Promé


D.r.p.d: drs. Rendel Rosalia,sra. Giselle Inees Rosalia, mr. dr. Rene Rosalia, sra. Josephienne Shcoop- Bazoer i sr. Victor Caldera.

This site uses Akismet to reduce spam. Learn how your comment data is processed.

%d bloggers like this: