Dosente i kargadó di lista di PIN Axel Pikero: Tuma medida promé ku morto kai na skol
Dosente i kargadó di lista di PIN Axel Pikero: Tuma medida promé ku morto kai na skol
Axel Pikero ta prekupá pa e seguridat na skolnan i ta haña ku a bira tempu pa gobièrnu entre otro laga instalá kamaranan di vigilansia tambe na esakinan. “Mirando e ola di susesonan violento kaminda entre otro hóbennan ta pèrdè nan bida, mi ta puntra mi mes kiko lo hasi sí un dia alumno- i dosentenan ta enbolbí den un suseso di tal índole riba tereno di skol”, segun e dosente i kargadó di lista di Partido Inovashon Nashonal (PIN).
Na opinion di Axel Pikero tin ku tuma akshon lihé promé ku morto kai tambe riba tereno di skol. E ta trese esaki dilanti, komo ku ultimo añanan tabatin susesonan lamentabel kasi den porta di skol. Personanan a keda likidá riba lugá di stashoná outo di 2 skol, mientras ku tambe a registrá tiramentu den besindario serkano di skolnan. Axel Pikero ta konbensí ku kamara di vigilansia na skolnan por tin un efekto preventivo riba tantu hóbennan na e skolnan komo riba personanan sospechoso ku ta trafiká den besindario di esakinan. No ta un sekreto públiko segun e hóben dosente, ku na komienso di skol, den ora di rekreo i tambe na final di skol tin vários hóben ta bin na kurá di skol purbando pa sedusí muchanan femenino dje skol i algun ku ke bende droga ku esnan ku ta na e skol òf asta ta presentá armá den kaso di peleanan despues di skol. “Pa prevení susesonan violento ku arma riba tereno di skol, fuera di kamara di vigilansia ta rekomendabel tambe akshonnan di kontròl den koperashon ku kuerpo polisial. Mas aleu dosentenan tin ku haña preparashon físiko i mental pa por dominá un situashon di agreshon na un manera responsabel,” Axel Pikero ta argumentá. E kandidato nr 17 di PIN, esta kargadó di lista dje partido blou kla, ta bisa ku no tin ku sera wowo pa realidat. Axel Pikero ta referí na posibel uzo di droga i tambe posibel poseshon di arma bou di alumnonan. Instalashon di kámara di vigilansia lo yuda kombati ambos akto ilegal na skol i prevení na tempu un suseso lamentabel riba tereno di skol. Axel Pikero tambe ta mustra riba e tendensia kaminda un grupo kresiente di hóben ta kana yená ku problemanan sosial. “Esaki tambe por okashoná ku un alumno por manifestá su mes di forma violento òf pon’é konsumí droga i alkohòl.” Finalmente Axel Pikero ta referí na guia di hóbennan: “Un di e métodonan ku mi ta sinti falta di dje den enseñansa ta e presensia di un sikólogo. Un profeshonal ku tin ku forma parti di e tim di kuido na nos institutonan di enseñansa ku por duna guia profeshonal tantu na e alumnonan konserní i si ta nesesario asta dosentenan.”
