Preparashon pa Elekshon

April 21, 2017 REDAKSHON

Willemstad – Durante e konferensha di Prensa ku a tuma lugá djaweps 20 di aprel, Konseho Supremo Elektoral a duna un resúmen di algun di e aktividatnan di preparashon pa laga votamentu pa skohe miembronan di Parlamento tuma lugá riba dia di elekshon 28 di aprel.

Pa loke ta trata e karchinan di vota
Entre tantu a manda e karchinan di vota pa tur hende ku tin derecho di vota. Esnan ku no a risibí nan karchi pa bai vota òf di kende nan karchi a pèrdè, por pasa na Kranshi entrante 20 di aprel 2017, presentá nan prueba di identidat bálido (ID) i risibí un kopia di nan karchi di vota. Mes momentu e persona ku no tin sédula bálido pa bai vota kuné, por hasi petishon tambe pa saka un sédula.
Kranshi lo ta habrí:
• Djaweps 20 di aprel i djabièrnè 21 di aprel di 16.30or te 19.00or.
• Djasabra 22 di aprel di 09.00or te 15.00or.
• Djaluna 24 di aprel te ku djarason 26 di aprel di 16.30or te 19.00or.
• Djaweps 27 di aprel di 09.00or te 15.00or.
• Dia di elekshon, djabièrnè 28 di aprel 2017 di 08.00or te 18.00or.

Papel di vota (Stembiljet)
Fin di siman pasá a kuminsá drùk e listanan elektoral. Esaki ta bayendo den bon direkshon i tur kos lo ta kla pa dia 28 di aprel. Trámite ta keda hasí pa prepará tur e paketenan i asina tur urna tin e rekisitonan nesesario pa dia di elekshon tur votadó por hasi uso di su derecho di vota.

Kaha di karton (Stemdoos)
Den pasado e prosedimentu pa usa kaha di karton a resultá mas ku sufisiente pa garantisá integridat di e proseso elektoral. Pa motibu ku e “stembussen” ku ta kumpli ku e spesifikashonnan legal no t’ei, lo usa kaha di karton dia 28 di aprel 2017. No a resultá posibel pa e “stembussen” ku ta kumpli ku e spesifikashonnan legal yega na tempu. Manera ta kustumber, miembronan di e sentronan elektoral lo risibí instrukshon intensivo adelantá, kaminda lo trata tambe ekstensivamente kon ta atendé korektamente ku e kahanan di karton.

Seguridat
Den kooperashon ku servisionan di polis i seguridat nashonal ta tuma tur prekoushon pa garantisá ku elekshon di dia 28 lo transkurí di un forma trankil, seif i na òrdu.

Observadónan internashonal
Dia di elekshon, 28 di aprel próksimo, lo tin na nos isla presensia di representantenan di entre otro Organization of American States (OAS), Caricom i Aruba komo opservadó. Nan lo vigilá desaroyo honesto i liber di e elekshon pa despues duna un relato ophetivo di nan opservashonnan.

Atentamente,

Presidente interino Konseho Supremo Elektoral
Charles Do Rego