Hensley Koeiman:“Pa basta aña ta eksistí un diskrepansia entre programanan di enseñansa i nos merkado laboral”

Hensley Koeiman:“Pa basta aña ta eksistí un diskrepansia entre programanan di enseñansa i nos merkado laboral”

WILLEMSTAD – Den kuadro di un mihó planifikashon di forsa di labor, pa nos merkado laboral, Hensley Koeiman, den su funshon di minister den e gabinete anterior, a prepará un pakete integral pa desaroyo di forsa di labor na Kòrsou pa eliminá e diskrepansia ku pa hopi aña tabata eksistí entre programanan di enseñansa profeshonal i nos merkado laboral,” Koeiman e bisa. Pa ahustá esaki i pa tin un relashon mas estrecho entre enseñansa profeshonal i merkado laboral, e eks titular di enseñansa a stipulá un dekreto pa lanta un konseho di enseñansa i merkado laboral (ROA) manera lei di enseñansa profeshonal ta preskribí.

Banda di esaki Koeiman, a lanta un grupo di trabou pa desaroyá un instituto nashonal nobo pa desaroyá nos forsa di labor. “Na mi opinion nos no por a sigui kopia programanan di formashon profeshonal for di Hulanda sin mas. Ku e instituto nashonal aki nos lo reskatá I salbagiardiá nos propio fishinan den koperashon ku nos empresanan.”

Alabes Koeiman, huntu ku su grupo di trabou, a prepará statutonan i nombra miembronan pa un instituto nashonal nobo pa desaroyo di fishi na Kòrsou. A manda e statutonan aki pa SBTNO, manera lei ta preskribí, pa e organisashon aki ratifiká e statutonan.

Tambe Koeiman a kumpli ku e desishon di Konseho di Minister di dia 3 di febrüari di aña pasá pa terminá supsidio pa e instituto Feffik entrante 1 di ougùstùs 2017. Ku e pakete aki Hensley Koeiman por fin a entamá un proseso nobo pa prepará ehekushon di un maneho nobo di nos forsa di labor. “Loke nos lo ke mira realisá ta pa mas lihé posibel nos fiha un vishon nobo ku partisipashon di tur esnan envolví den preparashon di nos forsa laboral,” e eks titular responsabel pa enseñansa a bisa.

Finalmente Koeiman a habri kaminda pa solushoná e problemanan struktural ku pa años e instituto Feffik a hañ’é konfrontá kuné. “Den e totalidat aki partisipashon di e sindikato SITEK i koperashon di empresanan mester perkurá ku preparashon di e maneho nobo aki ta basá riba e prinsipio tri-partite manera esei ta sosodé rònt mundu,” Koeiman a finalisá bisando.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: