Interes enorme di hendenan ku ta buska trabou Registrashon pa keda entrená pa trabounan di modernisashon di refineria a kumisá

Interes enorme di hendenan ku ta buska trabou Registrashon pa keda entrená pa trabounan di modernisashon di refineria a kumisá

Willemstad – Djasabra último, 22 april 2017, Ministerio di Desaroyo Sosial, Labor i Bienestar (SOAW) a tene un dia di registrashon pa tur hende ku ta interesá di risibí entrenamentu pa un trabou den e proyekto di modernisashon di refineria i Bullenbaai. Tabatin un interes enorme di parti di pueblo di Kòrsou. Tur e sinku lokalidatnan di inskripshon tabata bon bishitá henter e dia. Un total di 1627 persona a registrá.
Tabatin sinku lokalidat, repartí na diferente area di Kòrsou, kaminda personal di SOAW a risibí i yuda tur ku tabatei presente pa registrá. Debí na interes haltu pa registrá i asina partisipá den e entrenamentunan aki, SOAW a habri mas oportunidat pa registrá.
Desde awe djaluna 24 aprel 2017 ta posibel pa registrá den forma digital tambe. Por subi riba http://www.entrenapatrabou.com i yena e formulario pa registrá. Por subi e wèpsait aki via telefòn selular tambe i yena e formulario. Pa personanan ku no tin konekshon di internèt òf ku tin mester di asistensia pa yena e formulario digital, lo bai tin mas dia pa registrá. Esaki lo tuma lugá dia 6 i 7 di mei próksimo di 8or di mainta pa 8or di anochi. E lokalidatnan lo keda anunsiá despues.
E proyekto di modernisashon di refineria i Bullenbaai aki ta e proyekto di mas grandi ku Kòrsou a konosé. Den e proyekto aki lo bai konstruí un kantidat grandi di planta i edifisio kompletamente nobo pa e refineria. Tambe lo modernisá e planta di Energia Curaçao Refinery Utilities (CRU) i ekspandé e terminal di transbordo di krudo na Bullenbaai. E invershonista enkargá ku e proyekto aki ta e kompania estatal chines, Guandong Zhenrong i nan ta den estrecho koperashon ku tantu Universidat di Kòrsou (UoC) komo FEFFIK pa konkretisá e entrenamentunan aki.
Den e próksimo lunanan lo tuma tempu pa analisá i evaluá tur datonan. Despues lo kuminsá e proseso di hasi intake ku kada persona ku a registrá. Pa medio di e intake lo identifiká den kua grupo di entrenamentu kada persona lo kai.
Mester di mas o ménos 4.500 hende pa trabounan ku ta varia entre otro di pipe fitter, mekániko, lasdó, trahadó di konstrukshon, fèrfdó i elèktrishèn te ku instrumentista, supervisor, inspektor i hende ku por pinta den Autocad. Lo prepará hende pa hasi e trabounan aki na e nivel deseá i usando e sistema di edukashon basá riba kompetensia.

Ministerio di SOAW kier a gradisí tur e personanan ku ya a registrá i alabes hasi un yamada na tur hende ku ainda ta interesá, pa nan registrá nan mes pa entrenamentu pa nan futuro trabou via http://www.entrenapatrabou.com òf bini na e siguiente dianan di registrashon. Tambe ta posibel pa like e pagina di facebook “ENTRENA PA TRABOU”.

This site uses Akismet to reduce spam. Learn how your comment data is processed.

error: Content is protected !!
%d bloggers like this: