24 aprel 2017- Partido Nashonal di Pueblo su plan pa sigui yuda hende na trabou pa medio di “Micro -Learning” i “E-Learning”

Ban sigui yuda hende yega na trabou.
Willemstad – Na e momentonan aki e porsentahe di desempleo na Kòrsou ta pará na 13%. Esaki ta nifiká ku mas o ménos 13 mil hende no tin un trabou aktualmente. Esaki ta un sifra hopi altu i negativo pa nos ekonomia. Hopi biaha desempleo tin di aber ku un hende su falta di kompetensianan pa por ehersé sierto trabou, ku e konsekuensia ku mester buska hende di afó pa hasi e trabounan aki.
Pa duna un aporte na bahamentu di e kantidat di hende ku no tin trabou, Partido Nashonal di Pueblo ke introdusí e asina yama “Micro Learning”. Esaki ta un konsepto relativamente nobo kaminda ku yudansa di teknologia por duna tur hende e abilidatnan ku nan tin mester pa okupá e funshonnan ku tin habrí riba merkado. Den un gobièrnu nobo PNP lo bini ku inisiativa pa stimulá i finansiá e programa aki huntu ku E-learning pa eduká i reeduká nos hóbennan desempleá tambe na un manera efisiente i no-kostoso.
E manera di siña aki ta un manera digital i hopi práktiko i por wòrdu adaptá na kada un hende su nesesidat i kapasidat. Loke e programa aki ta hasi ta proporshoná na abo via di un sistema digital e material ku bo mester sa pa prepará pa bo trabou nobo. E material lo wòrdu suministrá den enkuentronan chikitu i nan lo tuma lugá den un sekuensia di kual tin prueba sientífiko ku e lo no kansa ni fada e hende. Tambe e material ta wòrdu presentá na Papiamentu pa hasi e informashon mas aksesibel i asina enrikesé bo konosementu i abilidatnan den e trabou.
E sistema aki ta un sistema fásil pa adaptá i tambe ta un sistema ku ta rekerí masha tiki esfuerso di e persona ku ta sigui’é. E ta un sistema ku ta konsistí di tópikonan simpel, konkreto i alkaso. E ta buta e persona semper na altura di e último avansenan i ta un sistema masha informal. Bo por sigui’é na unda ku ta i ki ora ku ta. Loke tambe ta interesante ta e echo ku e no ta un sistema kostoso i bo por implement’é den korto tempu.
Pues esaki ta un sistema práktiko, fásil i ekonómiko pa asina prepará nos hendenan di un manera profeshonal pa asumí kualke funshon den nos merkado laboral. Di e manera aki nos lo por evitá ku kompanianan ta buska trahadó di afó na promé instansia bou di e preteksto ku no tin yu di tera prepará pa asumí posishonnan spesífiko den nan organisashon òf negoshi. Tambe PNP lo bini ku inisiativa pa duna kompanianan 6 luna di grasia pa no paga kontribushon na seguridat sosial ora nan tuma nos hóbennan den servisio; di e manera aki ta duna e kompania tambe un insentivo pa hinka hóbennan den e proseso laboral. Di e forma aki PNP ta sigui inová i aportá na solushonnan pa nos pueblo paso ABO TA NA PROMÉ LUGÁ.