Firmamentu di Akuerdo di boluntat entre Kòrsou i Colombia pa agrikultornan lokal

Firmamentu di Akuerdo di boluntat entre Kòrsou i Colombia pa agrikultornan lokal

Den a kuadro di e Memorandum di Entendimentu (MdE), firmá na 2014 entre paisnan Kòrsou y Colombia, un delegashon konsistiendo di Ministerio di Desaroyo Ekonómiko (MEO), Ministerio di Salubridat, Medio Ambiente i Naturalesa (GMN) i ADECK a presensia e firmamentu di un akuerdo di entendimentu djaweps último na Riohacha.

E akuerdo di entendimentu firmá entre MEO i e Universidat di La Guajira ta e promé proyekto konkreto den e márgen di e MdE firmá entre e paisnan Colombia i Kòrsou.
E meta di e akuerdo di entendimentu aki ta duna inisio na e proyekto di seguridat alimentisio ku lo mester garantisá ku agrikultornan lokal den futuro serkano lo por modernisá e sektor di agrikultura na Kòrsou. Meta di e modernisashon aki ta pa oumentá nos produkshon lokal for di 6% (sifra di Banko Sentral) pa mas ku 15 % den e próksimo 5 añanan pero tambe pa oumentá nos efisiensia i kalidat di nos produktonan. E trayekto aki ta indispensabel mirando ku e lo konsentrá tambe riba e kapasitashon di nos agrikultornan i tambe nos funshonarionan lokal. Mas aleu e trayekto aki ta di sumo importansia si tene na kuenta ku Kòrsou komo un pais chikitu ta importá mas di 90 % di tur produktonan agríkola ku ta keda konsumí lokalmente. Esaki ta hasi nos pais sumamente vulnerabel na desaroyonan eksterno manera ta e kaso ora ku barkunan Venezolano no por trese sierto produktonan

Ku firmamentu di e akuerdo di entendimentu menshoná e Universidat di La Guajira ta mustra su disponibilidat pa pone kapasidat humano i konosementu disponibel na benefisio di e proyekto i Kòrsou di su banda ta pèrkurá ku por lo ménos 30 agrikultor lo partisipá den e trayekto aki.
E proyekto ta konsistí di kuater fase. Den e promé fase e universidat di La Guajira lo tuma muestranan di nos suela na tres área di Kòrsou ku ta Bándariba, Willemstad i Bánda bou na e diferente plantashonnan pa asina por analisá esaki. Ku e informashon aki e universidat den fase dos lo kapasitá alrededor di 30 agrikultor den métodonan ku por keda uza pa diferente tipo di suelanan pero tambe di vegetalnan ku lo por keda plantá di un manera mas efisiente i asina trese un rendimentu mas haltu.
Den e siguiente fase lo manda algun agrikultor Colombia pa bai kore un stazje bou di guia di e universidat na e diferente plantashonnan. Den e delaster fase e universidat huntu ku funshonario di GMN lo pèrkurá ku periódikamente lo bishitá e agrikultornan na Kòrsou pa asina guia nan ku e métodonan i tambe otro retonan ku nan lo por konfrontá.
Den hinter e trayekto tantu Adeck pero tambe funshonarionan di GMN ta enbolbí huntu ku MEO no solamente pa fasilitá e trayekto pero tambe pa haña e formashon nesesario.

E trayekto aki tin un durashon di 11 luna. E promé fase lo start dia 2 mei próksimo na momentu ku e funshonario di e Universidat lo ta na Kòrsou. Ophetivo final di e proyekto ta pa nos agrikultornan por produsí produktonan na kalidat di eksportashon na un preis kompetitivo.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: