Mester manda e rapòrt bek pa Komishon Wiel!! Pa koregí e erornan garafal promé ku tratamentu den Parlamento.

Mester manda e rapòrt bek pa Komishon Wiel!! Pa koregí e erornan garafal promé ku tratamentu den Parlamento.

Willemstad- frakshon di PAR a manda un karta siman pasa pa e presidente di Parlamento ku e petishon pa posponé e reunion di djaluna dia 24 di aprel 2017 pa deliberá ku Minister di Hustisia enkuanto rapòrt di Komishon di Investigashon (Komishon Wiel) en konekshon ku susesonan promé, durante I despues di e reunion públiko di Parlamento di 4 di yanüari 2017. Frakshon di PAR no tin muchu komentario riba e konstatashonnan i tampoko e rekomendashonnan di e rapòrt riba aktuashon di polis riba 4 di yanüari den PARLEMENTO. Ta un echo ku e asistensha tabata sumamente defisiente. Ta opvio ku un suseso asina den un Parlamento ta e bèrgwensa di mas grandi ku un pais por eksperensiá. Mirando e seriedat di e defisiensia den kuerpo polisial frakshon di PAR a urgí e presidente di Parlamento aktual pa pidi e Minister di Hustisia pa manda por eskrito pa Parlamento kua ta e medidanan ku el a tuma for di momento ku e la risibí e rapòrt menshoná pa mehorá di e funshonamentu di e kuerpo polisial.
Pa lokual ta trata e konstatashonnan di e Komishon Wiel riba e reunion ta opvio ku e presidente di Parlamento a habri e reunion na momento ku tabatin kuorum. Miéntras e presidente ta hibando palabra e ta wòrdu interumpí dor di un miembro ku ta pidi “roll call”, siendo tin kuorum. E presidente a aktua kompletamente segun e Reglamento di Órden ku ta vigente pa Kòrsou, pero e Komishon Wiel kier a krea e persepshon ku e presidente a violá nos Reglamentu di Órden. Ademas di esei Komishon Wiel ke krea e persepshon ku no tabatin kuorum pa e reunion siendo tabatin definitivamente kuorum. Pa lokual ta hibamentu di palabra, segun artíkulo 77 di e reglamento di órden, ta duna indikashon na kua momento un miembro ta hiba palabra. Ni un miembro no por hiba palabra promé ku e la solisitá esaki I haña palabra di e presidente di parlamento. Ta insolito ku un presidente ta hibando palabra, e ta wòrdu interumpí konstantemente pa pidi “roll call”, siendo tur presente ta nota ku tin kuorum pa e reunion sigui. No por otro, ku e intenshon maligno di e miembro di Parlamento ku tabata interumpí kontinuamente, su meta prinsipal tabata pa pidi e “roll call” (despues ku e la duna instrukshon na diferente miembro pa “stand by”) I kore sali bai manera e la hasi na diferente okashon. E intenshon tabata pa laga e 7 miembronan keda sin wòrdu huramentá, di manera ku nan por a krea un káos den gobernashon I stroba e gobièrnu pa traha pa pueblo.
Ademas Komishon Wiel no tabat’ei presente na e reunion pero a konstatá “a priori” ku e presidente mester a duna palabra na e miembro ku a pidi “roll call”. E komishon ta hasi dos fayo grandi:
1. No ta tene kuenta ku ora un presidente ta hibando palabra bo no por interumpié sin mas. E presidente aktual, meskos ku tur otro presidente, ta indiká ku e mester kaba di papia promé I no por interumpié. Den e reunion di 4 di yanüari no kier a laga e presidente kaba di hiba su palabra. Ta un forma masha grosero I sin rèspèt pa keda pretendé ku ora un presidente ta hibando palabra bo mester keda interumpié.
2. Na momento ku a pidi “roll call” e presidente I tur presente ta mira ku tin kuorum. artíkulo 67 di e Reglamento di Órden ta indiká ku ora ku no tin 11 miembro mas presente den e reunion, e presidente ta posponé e reunion, despues ku e la yama kada miembro pa verifiká ku nan ta presente. Den e kaso di 4 di yanüari 2017 tur presente por a nota ku tabatin kuorum, pues kua tabata e nesesidat pa e presidente hasi uso di artíkulo 67? Aki ta nota atrobe e meta ku tabatin tras di e “roll call”. Pa sali kore bai for di sala I stroba funshonamentu di Parlamento I stroba 7 miembro nobo demokrátikamente skohe pa drenta parlamento. Ademas ta bon pa menshoná eksplísitamente ku sra. Marilyn Alcalá-Wallé tabata presidente di e Komishon di Investigashon di Kredensial di e 7 miembronan ku mester a drenta Parlamento. Despues ku e rapòrt a sali sra. Alcalá-Wallé a aserka e otro miembronan ku tabata den e komishon di Investigashon di Kredensial I a konstatá ku Komishon Wiel no a aserka ningun di e tres miembronan di e Komishon di Kredensial pa tende nan ningun momento pa ningun pregunta ni aklarashon riba e suseso di 4 di yanüari último. Tumando nota di e dos fayonan flagrante aki, sra. Alcalá-Wallé na nòmber di frakshon di PAR den Parlamento pidi e presidente di Parlamento aktual pa posponé e reunion di djaluna I manda e rapòrt bek pa Komishon Wiel pa e por hasi e trabou manera debe ser, teniendo kuenta ku echo. No suposishon! Frakshon di PAR ta konsiderá ku e rapòrt den su forma aktual no ta kompleto I tampoko kla pa tratamentu den un reunion di Parlamento. Manera ya Frakshon di PAR a anunsiá anteriormente, e frakshon no ta partisipá na e maneho nobo den Parlamento kaminda ta krea bochincha i desunion den Parlamento, sigur no riba un rapòrt mitar kla. Tampoko frakshon di PAR ta yuda fomentá desòrdu i agreshon den Parlamento.

Marilyn Alcalá-Wallé

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: