Pènel polítiko pa klousurá periodo di kampaña. Korsou Kampeon, pero ku Vishon!

Pènel polítiko pa klousurá periodo di kampaña. Korsou Kampeon, pero ku Vishon!

Djarason 26 di aprel lo tin e último pènel polítiko pa klousurá kampaña elektoral 2017, pa elekshon di 28 di aprel binidero. E pènel aki ku lo tuma lugá na Rodeo House of Ribs lo ta di 3or di mèrdia pa 5or di atardi, anto ta transmití pa radio Hoyer 101.9 FM. E ta un inisiativa di Fundashon Bario pa Bario, sostené pa un grupo di amigu. Meta prinsipal di e pènel aki ta krea un ambiente di pas, trankilidat i konfiansa, ya ku ta e deseo ferviente ku djis despues ku resultadonan di e elekshon bira konosí mester sera e kapítulo di konflikto i antagonismo kontinuo entre partidonan polítiko i sierto eksponentenan.
Shonnan, último 8 añanan, polítika na Kòrsou a sali for di su “gareel”. Nos tin asina tantu desunion i tambe issues karakterisá pa diferensia di opinion entre e partidonan i polítiko, ku ta bati so ta bati otro riba tur front, komo tal nos pais no ta progresando. Pa 8 aña kaba tin un guera kampal den nos pais i niun hende i práktikamente ni ningun sektor no ta bayendo padilanti. Esei no mester kontinuá den futuro. Atraves di e pènel aki programa Bario pa Bario ke ofresé un plataforma pa nos futuro gobernantenan interkambiá di opinion i pone un base stabil pa kambio ku pueblo di Kòrsou komo testigu. A skohe konsientemente pa un pènel no muchu grandi i konsentrá mas bien riba esnan ku for di prinsipio no tabatin opheshon pa tene elekshon dia 28 aprel. Komo tal a manda invitashon pa lidernan di PAR, señor Eugene Rhuggenaath, MAN señor Hensley Koeiman, PNP señor Humphrey Davelaar, UKH señora Omayra Leeflang, PIN señora Suzy Camelia Romer.

• Ta probá ku paisnan, kompanianan i institutonan ku un vishon bon deliniá i ku ehekushon determiná a logra nan meta. Ehèmpelnan ta Barbados, Bermuda, Singapore, Dubai i hopi otro pais mas. Kompanianan manera Apple, Microsoft, Samsum, Tesla etc.
• Ta konosí tambe ku Kòrsou no a bria último añanan ku desaroyo di un bon vishon. Mayoria biaha nos a keda kologá den diskushonnan di tèrmino kòrtiko of vishon ad hoc i oportunista.
• Si Kòrsou kier bira realmente un pais Kampeon, nos no por otro sin desaroyá un vishon pa tèrmino kòrtiku i largu. Nos mester ta determiná den esei despues di e elekshon tan importante ku ta na kaminda. Si e gobièrnu nobo, huntu ku stakeholders no logra traha un plan di tèrmino largu i tambe pone un team fiho enkargá ku ehekushon, nos pais lo bolbe kai den gara di “adhokrasia” i polítika oportunista.
Ta p’esei e esfuerso pa atraves di e pènel, tende partidonan polítiko su vishon riba algun punto di eskoho:
1. Vishon i tambe inspirashon pa Korsou:
Kiko ta e Vishon en general pa Korsou? Kiko ta e mensahe klave pa nos Korsou ta Kampeon den Region i kiko lo mester ta nos 3 balornan klave pa nos prosperá
2. Vishon stabilisashon i kresementu Ekonómiko: Korsou tabata na vispera di un “ekonomia nobo”, kaminda gobièrnunan di turno tabata negoshando ku invershonistanan tokante desaroyonan na aeropuerto, den haf, partnership pa DOK i CPA, hotèl nobo den Pen, Refineria nobo ku Chinesnan, strategia nobo pa nos sektor finansiero. Tur e asuntunan aki ta kayendo na awa dor di nos situashon polítiko di konflikto kontinuo.
Pregunta: kiko ta e vishon pa garantisá ku tur e oportunidatnan lo bolbe subi agènda di Korsou i tambe porfin trese un ekonomia duradero pa Korsou.
3. Vishon pa garantisá okupashon di kuponan di trabou.Vishon pa Edukashon, Formashon e inovashon di enseñansa.\
4. Vishon pa drecha gobernashon i aparato públiko.
5. Vishon pa ku nos deporte. Mester kuminsá brand nos isla komo “the island of sports and business”. Nos ta prestando tremendo riba nivel mundial ku deporte. Den Beisbòl, futbòl, atletismo, karate i tambe kick boxing nos ta prestando komo un di e mihónan den region.
Pregunta: ta e vishon pa e 4 añanan benidero pa engrandese nos prestashon deportivo i definitivamente laga Korsou meresé e nòmber di “Kampeon den Region” riba e tereno di “sports and business”.
6. Vishon finansiero
7. Vishon i strategia pa inová riba tur tereno.
8. Vishon riba envolvimentu di pueblo atraves di skol i bario.
9. Klousura. 3 minüt pa inspirá pueblo. Pues no propaganda, pero inspirá, motivá i duna pueblo speransa i konfiansa ku nos gobernashon ta bai mehorá!
For di Rodeo House of Ribs di 3or pa 5or, transmití pa radio Hoyer, 101.9 FM
.
Erwin Raphaela

This site uses Akismet to reduce spam. Learn how your comment data is processed.

error: Content is protected !!
%d bloggers like this: