“MAN TA KEDA PARA PA DIGNIDAT HUMANO”

“MAN TA KEDA PARA PA DIGNIDAT HUMANO”

Riba petishon di diferente persona, organisashonnan sosial i medianan di komunikashon, Direktiva di MAN pa medio di e komunikado aki ke aklará lo siguiente.

MAN ta reafirmá ku e ta un partido sosial demókrata progresivo, fundá dia 6 di febrüari 1971, ku ta basa su mes riba prinsipionan fundamental di dignidat humano, hustisia sosial, libertat, solidaridat i demokrasia. E prinsipionan aki ta enserá ku MAN ta boga pa un komunidat kaminda, *tin igualdat di derechi polítiko, ekonómiko i sosial i oportunidat pa tur hende sin tene kuenta ku rasa, religion, género i etnisidat *derechi di kada hende ta sigurá pa e por desaroyá i logra e mihó oportunidatnan den bida segun su kapasidatnan *tin sosten i koperashon konsiente di hende pa hende *ta garantisá ku tur hende tin mesun oportunidat i derechinan ekonómiko, sosial i politiko *kada ser humano tin derechi riba un bida kaminda e ta haña satisfakshon di su nesesidatnan básiko manera: alimentashon, siguridat, aseptashon sosial i rekonosementu.

Un sistema ekonómiko ku ta pone dignidat humano komo tema sentral. Un sistema ekonómiko ku no ta basá riba eksplotashon di hende, pero ta respetá dignidat humano pa asina produsí bienestar i prosperidat pa un i tur enbes di hamber i miseria pa un gran parti di komunidat. Den e sistema ekonómiko aki, gobièrnu/estado ta funshoná pa no solamente sigurá kresementu ekonómiko, pero en partikular pa e kresementu aki keda repartí a base di un sistema hustu den e afan pa redusí mas tantu posibel e desigualdat sosial grandi ku ta eksistí ketu bai den nos komunidat. Pa e elekshon benidero Man a forma un lista fuerte i balansá di kandidato ku ta karga e prinsipionan ariba menshoná i ku ta dispuesto pa lucha tenas pa logra un komunidat mas hustu i sosial. Nos no por sigui permití ku un grupo grandi den nos komunidat ketu bai ta keda eksklui. Tampoko sigui tolerá un situashon kaminda hopi suidadano no ta sinti ku komunidat ta brinda nan e derechinan básiko kun an meresé. Pa e motibu aki den un gobièrnu nobo despues di 28 aprel próksimo, MAN lo bolbe para pa un maneho kaminda e suidadano ta sinti su mes inkluí i parti di e totalidat. Un maneho ku ta pone dignidat humano komo tema sentral di maneho. No por tin ningun desaroyo positivo si e komunidat no tin partisipashon i hendenan ta sinti nan mes ekskluí di tur desaroyo.

Direktiva di MAN, 24 aprel 2017

This site uses Akismet to reduce spam. Learn how your comment data is processed.

error: Content is protected !!
%d bloggers like this: