GOBIERNU DI KORSOU TA FELISITA TUR TRAHADO KU SELEBRASHON DI DIA DI OBRERO MAÑAN DIA 1 DI MEI.

May 1, 2017May 3, 2017 REDAKSHON

Willemstad – Mañan djaluna dia 1 di mei, ta dia di Obrero akí na Kòrsou.
E dia di konmemorashon tin su raís den e movimientu di sindikatonan mundial for di siglo 19 i den alrededor di 80 pais rònt mundu ta selebrá un dia di obrero demonstrando solidaridat ku trahadornan local, pero tambe rònt mundu.
Na Kòrsou tambe a skohe e fecha di 1 di mei meskos ku algun otro pais manera e Federashon di Rusia, China, Thailandia i Vietnam, djis pa menshoná algun. Algun pais tambe ta selebrá e dia di obrero, pero riba un otro fecha. Na Merka por ehemplo ta selebrá dia di obrero riba e promé djaluna di sèptèmber, i na Canada dia 4 di sèptèmber. Na Hulanda si dia di Obrero no ta un dia liber ofisial.

Riba 1 di mei 2017 na Kòrsou, ta duna honor na tur trahadó i no ta importá den kuá sektor i ta konmemorá tur baluarte ku a lucha, i kontribuí pa mehorá kondishonnan di trabou, tur esnan ku a traha riba i ratifiká leinan laboral pa protegá trahadornan i ta duna balor na sindikatonan di trabou ku ta kubri tur sektor.
Pues dia di Obrero tin su raís den e movemientu di sindikato ku a lucha pa trabou desente ku ta inserá 8 ora di trabou, 8 ora di rekreashon i ocho ora di sosiegu.

Aspektonan relashoná ku trabou ta un reto akí na Kòrsou. Segun datos ofisial di januari 2017 di Ofisina di Estadistika di Kòrsou e tasa di desempleo bou di Hóben di entre 18 aña i 24 aña tabata 36.8% na final di 2016. Bou di adulto hòmber i muhé e tasa di desempleo tabata 13.3%.
Den e delaster aña i lunanan hopi siudadano a pèrdè nan trabou pa motibu di kompanianan ku a sera. Maneho debil, pero tambe kambionan den mundu di trabou ku ta hasi sierto tareanan obsolete, ta un motibu i tin hopi mas.
Pa trese kambio den e sifranan di e tasa di desempleo i pa baha esaki bou de hóben na por ehemplo 10% i adulto na por ehemplo 7%, kresementu ekonómiko di alrededor di 3.5% ta krusial. Más kupo di trabou nobo habrí, más hóben i adulto lokal bon prepará ku e kompetensianan atkirí pa e kuponan nobo por haña un trabou desente.
Kambio ta posibel si tur partner den nos komunidad traha huntu den un forma tri-partite. Si tin konfiansa, invershonistanan ta invertí i proyektonan ekonómiko por krea kupo di trabou nobo.
Komo Pais nos lo mester traha riba aspektonan manera étika di trabou (work ethics), produktividat haltu tambe ora no tin supervishon direkto. Nos tasa di produktividat lo mester ta por lo menos pareu i si por un tiki mas haltu ku islanan den nos serkania den Karibe, pero pa logra esaki e gastunan pa biba mester baha di tal forma ku e sueldo mínimo por kubri tur gastu pa biba desente, i no mester ta asina ku e sueldo mínimo na mes momentu ta sueldo máksimo, pasonbra esaki ta kita e gana pa presta mas tantu.

Sektor di Labor, huntu ku empresarionan i representantenan di plataforma di sindikato konhuntamente mester traha na forma, entrená i prepará e trahadó modèrno akí pa nan tin e kompetensianan ku e kuponan di trabou nobo aki di e proyekto grandi nobo ta eksiguí, sea ku ta Guandong Zhenrong, Hospital Nobo Otrabanda, Pier i/òf otro proyekto grandi, nos hendenan lokal mester ta prepará i e leinan lokal mester ta adaptá pa guarantisá ku e trahadornan akí ta funkshoná den un trabou desente.

Pa logra esaki mester entrená nos trahadornan riba nivel haltu di kalidat, mester informá nan debidamente di nan derechonan, pero tambe nan debernan relashoná ku leinan laboral, i mester kontrolá tur aspekto di trabou pa nan traha bou di kondishonnan akseptabel segun regla di ILO (International Labour Organization) ku Kòrsou ta asosiá kuné.
Nos por logra hopi si nos traha duru, traha huntu, i di parti Gobièrnu mester hasi tur loke ta na alkanse pa huntu ku komunidat logra e metanan akí.

Den kuadro di e fecha memorabel aki Gobièrnu di Kòrsou ta desea tur trahadó di Kòrsou un dia di refleho fenomenal di ambiente di nan koleganan i famianan na Kòrsou.