Proyekto Resiklá
Proyekto Resiklá
Willemstad – Pa selebrá e promé aña di eksistensia di Passionistas, e plataforma aki ta organisá durante e Passsionistas Pop-Up Fair riba dia 3 di yüni na Kurá di Arte, un kolekshonamentu di material resiklá pa 2ndLifeCuraçao, Limpi i Bold Fashion Curaçao. E meta di e proyekto Resiklá ta pa engrandesé e konsientisashon tokante durabilidat di medio ambiente i pa stimulá produkshon lokal di produktonan resiklá.
Passionistas ta hasi un petishon na henter komunidat di Kòrsou pa yuda kolektá bleki grandi i usá di lechi di puiru, kòfi i komestibel. Tambe por kolektá “drijfhout”, palu di palèt i hèrmènt ku no ta usa mas. Andy Kirchner di 2ndLifeCuraço ta usa e materialnan aki pa traha “kaarsenhouders” i otro artíkulonan dekorativo pa kas.
Debrah Nijdam i Mitchell Lammering ku a kuminsá e proyekto Limpi, ta prosesá plèstik resiklá den “lampenkappen” i “onderzetters”. E duo ku ta diplomá den “Industrial Product Design”, a krea nan mes mashin pa produsí produktonan nobo. E plèstik kolektá ku nan por usa pa prosesá ta bòter di produktonan di limpiesa, dòpi i tapa.
Den e área di moda tambe por integrá materialnan resiklá hopi bon. Junaiska Geferts di Bold Fashion Curaçao ta krea asesorionan úniko i artístiko di entre otro pidanan di kalbas i boton usá. Junaiska tin e intenshon pa traha mas kolekshon di asesorionan ku materialnan resiklá i por transformá e botonnan kolektá den un kadena fenomenal.
Por entregá e material kolektá durante di e di sinku edishon di e Passionistas Pop-Up Fair serka e doñonan di 2ndLifeCuraçao, Limpi i Bold Fashion Curaço ku lo ta presente huntu ku e otro passionistas pa bende nan produktonan ku nan mes a traha. E feria lo tuma lugá na Kurá di Arte entre 15:30 pa 20:30. Durante e edishon speshal aki Fasta Clothing tambe lo presentá un pop-up fashion showcase.
Pa mas informashon tokante e filosofia di Passionistas, detaye di e feria i e proyekto, por bishitá e página di Facebook: http://www.facebook.com/passionistascommunity. Òf por yama e number di telefòn 517-6513 i manda un imeil na info.passionistas@gmail.com.