Oportunidat pa registrá ta kontinuá na Kasnan di Bario i FEFFIK

Oportunidat pa registrá ta kontinuá na Kasnan di Bario i FEFFIK
Willemstad – Ministerio di Desaroyo Sosial, Labor & Bienestar (SOAW) ta enkargá ku e tarea pa registrá personanan ku ke risibí entrenamentu pa un trabou den e proyekto di modernisashon di Refineria Isla i Bullenbaai.
SOAW ya a organisá diferente seshonnan di registrashon ku éksito i awor lo sigui ku e seshonnan aki kasnan di bario di SOAW. Pueblo por akudí na Kas di Bario Brievengat na John Monsanto z/n, Kas di Bario Punda na Tauber-building, Prinsenstraat # 86, Kas di Bario Otrobanda na Breedestraat # 171/180 i Kas di Bario Sta. Maria na Jan Noordynweg for djaluna te ke djabierne entre 8:00 am i 11:30 am i 2:00 pm i 04:00 pm.
Tambe tin oportunidat pa registrá na Fundashon pa Edukashon i Formashon di Fishi i Kapasitashon (FEFFIK) di djaluna pa djabièrnè parti mèrdia, entre 2:00 pm i 6:00 pm.
SOAW ta hasi un yamada na tur habitante ku ke traha pa e proyekto grandi aki, pa registrá.
Bou di asistensia, bishitantenan por skohe un of mas tipo di entrenamentu ku tin riba e formulario digital. Ta trata di e siguiente fishinan: Pegadó di pipa / Pipe fitter, Mekániko di planta / Plant mechanic, Mekaniko di makinaria / Machine mechanic, Lasdó / Welder, Trahadó di konstrukshon / Concrete worker, Trahadó ku material refrakto / Refractory worker, Trahadó di stelashi / Scaffolder, Insuladó / Insulator, Blasdó / Grit blaster, Fèrfdó / Painter, Elèktrishèn / Electrician, Instrumentista / Instrumentation, Trahadó di limpiesa industrial / Industrial Cleaner, Pagadó di kandela / Fireman, Inspektor di seguridat / Safety inspector, Pintadó, operadó di AUTOCAD / Drafter/CAD Operator of otro.
For di 24 di aprel a habri un website pa interesadonan ku no ta rekerí asistensia di Kasnan di Bario di SOAW of di FEFFIK por registrá nan mes. Pues, interesadonan ku tin akseso na internet via un kòmpiuter of telefòn selular por registrá nan mes via http://www.entrenapatrabou.com.