SELIKOR I SINDIKATONAN DI ABVO I BTG A FIRMA CAO

May 13, 2017 REDAKSHON

Djaluna atardi dia 8 di mei gerensha di Selikor i di sindikatonan ABVO i BTG a reuní dilanti e personal di Selikor i firma CAO di Selikor NV. “Mi ta sumamente gradisí na tur esnan ku tabata parti di negoshashonnan pa yega na nos CAO. Laga nos sigui pa dilanti i traha riba desaroyonan na Selikor i ku rèspèt pa otro”, tabata e mensahe di direktor general di Selikor sr. Wesley Kook durante e momentu ofishal. Sr. Kook a sigui bisa ku riba kada punto ku a keda tratá durante e negoshashonnan a pone énfasis riba prestashon i bienestar di e trahadó i di e kompania. Tambe sr. Kook a indiká ku den e CAO ku ta keda firmá, e reglanan di kompania ta mas visibel i komprendibel pa kada trahadó.

Despues di un periodo di negoshashon di kasi 2 aña ABVO, BTG i Selikor a yega na un akuerdo pa ku e CAO di e kompania. E akuerdo laboral kolektivo ta konta pa un periodo di 2017 te ku 2020. Vice Presidente di ABVO sr. Adrie Willems, Presidente di BTG sr. Frensley Sillié i sr. Wesley Kook a firma e akuerdo laboral den presensha di miembronan di grupo di servisio i bestür di ABVO i BTG, i tim di negoshashon di Selikor.

Tantu Vice Presidente di ABVO i Presidente di BTG a gradisí e miembronan di grupo di servisio di ámbos sindikato pa nan esfuersonan i sakrifisionan durante e periodo di negoshashon. Tur dos sindikato a bisa ku e negoshashonnan no a bai fásil. Ku tabatin momentunan difísil ku asta a trese stagnashon den e negoshashonnan. Apesar di esaki ámbos sindikato no a entrega i a hasi tur nan posibel pa saka lo máksimo for di e negoshashonnan saliendo na bienestar di e miembronan ku nan ta representá i di e kompania.

Finalmente tantu gerensha di Selikor i e representantenan di ABVO i BTG ta satisfecho ku lokual a akordá den e akuerdo laboral kolektivo di Selikor NV.