Minister Presidènt Gilmar Pisas: “Kòrsou tin oportunidat pa bira tòp den region”

Minister Presidènt Gilmar Pisas: “Kòrsou tin oportunidat pa bira tòp den region”

Willemstad – Durante un rueda di prensa ku Minister Presidènt Gilmar Pisas a tene awe tardi tokante di e konferensha ku su delegashon a partisipá na dje siman pasá na Beijing China, el a enfatisá ku Kòrsou por benefisiá plenamente di invershonnan ku China ke hasi. “Si Kòrsou tuma e oportunidat aki i hasi bon uso di dje, porfin nos pais por realisá e desaroyo ku nos ta buskando pa algun dékada kaba”, asina e Minister Presidènt a deklará, agregando: “nos por bira tòp den region”. E desaroyo aki por keda kristalisá pa medio di e kompania estatal di China Guangdong Zhenrong Energy Company Ltd. (GZE), ku ta invertí den modernisashon di refineria, CRU i Bullenbaai.

Minister Presidènt Pisas huntu ku un representashon di Refineria di Kòrsou (RdK) i di Multi Disciplinary Project Team (MDPT) tabata presente na Beijing kaminda e foro “Fortifiká koperashon internashonal i yuda konstruí e ‘Belt and Road’ pa un Desaroyo ‘Win-Win’” a tuma lugá. One Belt One Road ta un strategia di desaroyo di gobièrnu Chines basá riba koperashon a base di rèspèt i benefisio mutuo, kual e gobièrnu Chines ke logra a base di konekshon ku partinan stratégiko di mundu, manera entre otro Karibe i Latinoamérika.

Desaroyo
E strategia di desaroyo aki ta loke lo benefisiá Kòrsou. Invershonistanan en general tin bista solamente riba e ganashi ku nan ke logra, loke ta trese hopi bes kuné dominio i eksplotashon. Sinembargo China ke hasi negoshi a base di desaroyo. Desaroyo di e hende, di e empresa i di e pais (People, Enterprise, Nation). Segun Minister Presidènt Pisas ei Kòrsou tin oportunidat di logra e desaroyo ku Kòrsou ke, pero ku ta difísil pa logra sin sosten di un partner grandi i poderoso, ku tambe ta kere den desaroyo di e ser humano. Kon poderoso China ta, ta konosí: e pais tin e ekonomia di mas grandi despues di Merka i e tin e reserva finansiero di mas grandi di mundu, esta di 4 trilion
(esta 4 mil bion) dòler. For di aña 2005 China ta invertiendo den práktikamente tur isla den Karibe.

Konferensha finansiero
Den kuadro di e foro tabatin tambe e konferensha finansiero “E Promé Konferensha Internashonal Avansá tokante industria i finansa di ‘The Belt and Road’”, ku respaldo di “Silk Road Planning Research Center”, “International Cooperation Center” i “National Development and Reform Commission”. E último aki ta e organisashon di gobièrnu Chines enkargá ku maneho makroekonómiko di China i komo tal e ta hunga un ròl importante den e invershonnan internashonal di China. Tabatin vários representante di gobièrnu Chines presente na e konferensha aki. Minister Presidènt Pisas a establesé kontaktonan importante ku China Development Bank, kual ta e banko ku lo finansiá e invershon ku GZE lo hasi na Kòrsou. Por sierto, e banko aki tin mas ku 1 trilion dòler na su disposishon pa hasi invershon den eksterior.

Minister Presidènt Pisas a splika ku GZE lo karga su invershon e mes, sin kontribushon di RdK, ni di gobièrnu di Kòrsou i tampoko di gobièrnu di Hulanda. E invershon ku GZE ta hasi na Kòrsou, ta kai bou di e paraplü di e strategia di desaroyo di gobièrnu Chines One Belt One Road. Na su turno, esaki ta pone ku China Development Bank lo usa un tasa di interes hopi mas abou pa e fiansa ku e ta duna na GZE pa e proyekto. Konsekuentemente esaki lo benefisiá RdK i gobièrnu ya ku e hür ku RdK lo risibí di GZE lo ta mas atraktivo. Banda di tur esaki, e echo ku e proyekto ta kai bou di e paraplü di One Belt One Road lo habri kaminda pa mas kompania estatal Chines tambe bin invertí na Kòrsou, loke gobièrnu lo pèrkurá pa resultá den mas kupo di trabou pa hendenan lokal. Den e Heads of Agreement ku gobièrnu i RdK a firma ku GZE tin pasahenan kaba inkluí ku lo garantisá mas aktividat laboral pa e trahadó lokal i aktividat empresarial pa negoshinan lokal.

Relashon
Pa e motibunan aki tabata di gran importansia ku Kòrsou tabata presente na Beijing durante di e konferensha internashonal. Kultura Chines ta respetá i duna hopi balor na relashon di hende pa hende, i tambe na relashon di pueblo pa pueblo. Na China a mira Kòrsou su bishita komo un refleho di boluntat i kompromiso pa fomentá i mantené e relashon ku tin ku GZE, despues ku aña pasá RdK i gobièrnu a firma e Memorandum of Understanding (MoU) i Heads of Agreement ku GZE. Ademas, den e aña aki, University of Curaçao (UoC) i despues PSB Bank tambe kada unu a firma MoU ku GZE.

Na China Minister Presidènt Gilmar Pisas tabatin tambe reunionnan ku alto representantenan di diferente kompania internashonal Chines, manera entre otro GZE mes i e kompania di ingenieria HQC ku a ehekutá proyektonan grandi na entre otro Panamá, Georgia, Costa Rica, Cuba i Venezuela. GZE lo bai traha ku e kompania HQC riba e proyekto di modernisashon di refineria, CRU i terminal di Bullenbaai. Minister Presidènt Pisas ta satisfecho ku e kalidat i e nivel haltísimo di “Corporate China”, kual lo keda desplegá na Kòrsou tambe den e proyektonan ku den un futuro serkano lo mira lus di dia.

Nashonal
E loke Minister Presidènt Gilmar Pisas a eksperenshá na China a konvens’é ku e invershon di GZE tin benefisionan di tal magnitut pa Kòrsou, ku ta rekomendabel pa elevá e tópiko aki riba nivel di partidonan polítiko. “E proyekto aki mester ta un tema na nivel nashonal”, el a finalisá bisando.

DIKON CHINA TA INTERESÁ DEN KÒRSOU:

• Posishon stratégiko nèt dilanti di Latinoamerika
• Haf profundo i bon desaroyá
• Serka di kanal di Nicaragua, ku lo ta hopi mas grandi ku kanal di Panamá, amplio sufisiente pa barkunan gigante transportá nan karga pa China
• Serka di materianan prima di Latinoamerika
• Situá den Karibe ku posibilidat pa desaroyá turismo di klase haltu
• Struktura polítiko stabil, ankrá riba lei
• Sistema hudisial sólido, rekonosé mundialmente
• Profeshonalnan ku konosementu i kapasidat indiskutí
• Infrastruktura bon desaroyá
• Sistema finansiero internashonal fuerte
• Telekomunikashon na nivel mundial

This site uses Akismet to reduce spam. Learn how your comment data is processed.

error: Content is protected !!
%d bloggers like this: