ART & MORE KU SALSBACH JAZZ TRIO

ART & MORE KU SALSBACH JAZZ TRIO+VARIOS PIC

WILLEMSTAD- Art and More ta kla pa un kombinashon úniko ku ta trese ambiente di jazz i ekspreshon di Arte riba 9 i 10 di yuni proksimo na Caracasbaaiweg 360-362. P’esei nos ke deleita bo ku historia di Salsbach Jazz Trio pa tur kategoria di edat sali gosa di ambiente. E kombinashonAngel Salsbach i Etzel Provence tabata forma parti di “Tropical Combo” den añanan 1962 pa 1964. E banda musikal aki tabata toka tur sorto di muzik, pero en espesial foxtrot. Un dado momentu aktividat di “Tropical Combo” a bira menos i di ripiente Angel a haña un invitashon di e “Indische Vereniging”, di e tempu ei, pa toka na un aktividat di nan. Angel i Etzel a traha un repertorio i a pidi Carlos ”Cayochi” Salsbach pa yuda nan ku drùms. For di e momentu ei nan no a pensa mas pa sigui toka ku e combo, por si akaso e combo bini ku aktividatnan atrobe. Asina ta ku nan a sali pa di prome bia komo trio dia 30 di yüni 1964, tokando pa e “Indische Vereniging”. Despues di e anochi ei, nan a kuminsa puntra nan mes: “E públiko di Kòrsou lo ke tende i apresiá muzik di Jazz?” En todo kaso nan a dal bai, kuminsando ku pone nan mes na altura di un ke otro: studiando e materia i skuchando e grandinan den Jazz. Sr. Etzel Provence a splika ku komo ku Cayochi Salsbach tabatin su mes grupo di muzik, e no tabatin masha tempu pa e trio. Den e tempu ku a sigui, defuntu Henry Lauffer (ku tambe tabata toka antes den “Tropical Combo”) a bin yuda nan ku drùms.
Despues di hopi kritika propio, Angel i Etzel a disidí di sali den públiko bou di e nòmber “Salsbach Jazz Trio”. Un di nan prome aktuashon tabata den studio di Curom (e tempu ei, riba pòstkantor na Punda) na aña 1965.
Den e aña‘ki Salsbach Jazz Trio (SJT) a toka na un anochi spesial organisá pa esnan ku a studia na Hulanda; esaki a tuma lugá na Hotel Bianca (loke ta Hotel Holland awor).

Despues di Cayochi i Henry, Angel i Etzel a purba diferente drùmer, pero ningun di nan no por a duna e sabor nesesario di jazz, i ademas ora yega na un improvisashon pa drùms, ningun no por a want’é. Mientras tantu “Stichting Jeugdconcerten” a aserka SJT ku e petishon pa trese un konsierto di Jazz, ku splikashon, pa hubentut. Na aña 1966 Julian Coco a bishitá Kòrsou i el a sera Angel i Etzel konosí ku e musikonan di e orkesta ku na e momentu ei tabata toka den “Cave de Neptune” di hotel Intercontinental.
Komo ku Angel i Etzel tabata preparando nan prome konsierto pa hubentut, nan a pidi Philip Greene (drùmer di e orkesta menshoná) pa yuda nan.
Asina ei nan a sali ku nan prome konsierto pa hubentut dia 15 di sèptèmber 1966,den sala di Dam Negropont (Emmastad), dunando dos konsierto tras di otro riba e mesun maïnta.

Despues di e konsierto eksitoso na Dam Negropont, Ramon Penzo a kuminsá ensayá ku SJT.
Komo ku Ramon tabatin diferente grabashon di jazz, ku e tabata skucha i gusta, el a desaroyá basta rápido, siguiendo tepnan ku Angel i Etzel tabata dun’é.
For di aña 1967 el a keda komo drùmer fiho di SJT te 1976.
Den e añanan aki por a tende masha poko muzik di jazz na radio, pa no papia mes di “live”. Segun sr. Provence,durante e dékadanan ku a sigui, ta SJT tabata e úniko trio di jazz, formá pa yu di tera i diferente hende ta komentá ku ta e trio aki tabata e pionero pa tur esnan ku a sigui despues.
Esaki ta un relato kon Salsbach Jazz Trio a lanta. Mirando e kantidat di drùmernan ku e trio aki a konosé, Angel i Etzel semper tabata papia di “Trio los dos”, i unda ku nan a toka, e komentario tabata ku: bas i piano ta komprondé otro bon, ta e drùms so no ta di akuerdo ku nan tur ora.
Nunka Angel i Etzel no a pensa di amplia e trio, pasobra nan a pensa ku ta dolo di kabes só esaki por trese.
Segun sierto proyekto ku nan haña òf entamá, nan ta hasi uzo di otro músiko òf artista.
Fuera di jazz SJT ta toka tur sorto di muzik i banda di esaki nan a komponé varios obra. Aki nos ta meshoná tur nan evento.
1967 – Prome konsierto ofisial pa públiko na Dam Negropont.
– Diferente konsierto pa hubentut; tambe na Boneiru.
1968 – Konsierto na Dam Negropont.
– Partisipashon den e show musikal “Esta riku nos bida ta”, skirbí i komponé
pa Richard Simon ku direkshon musikal di Etzel Provence. Esaki tabata
spesial pa Apertura di Centro Pro Arte.
1969 – Première di “Rebelyon di Katibu”, komposishon di Angel Salsbach.
– Konsierto na Hotel Hilton ku Bob Loggen (saksofon) i defuntu Alberto
Badaracco (tròmpèt).
1970 – Konsierto de Aranjuez den Centro Pro Arte ku Fred de Haas (kitara).
– Konsierto pa Arubaanse Kunstkring na Aruba i presentashon na Tele Aruba.
– Dia Tele Curaçao a kumpli 10 aña, SJT a trese un programa na T.V., konsis-
tiendo di diferente tema musikal di varios programa, for di apertura diario te
ora Tele Curaçao sera.
1971 – Un gira pa St. Maarten i Sürnam dunando konsierto i tokando riba invitashon.
1972 – Musical “E Lucha Final”, muzik di Etzel Provence, letra di Angel Salsbach.
1973 – “Fiesta den Kunuku”, muzik di balèt komponé pa Etzel Provence komo
enkargo di Aruba. Den e proyekto aki a bini tres músiko aserka:
Aya Landheer, Flùit; Iman Landheer, Klarinèt; Henry Sweers, violonsèlo.

1974 – Prome muzik pa sine ku SJT a traha i ku a bira un hit den eksterior. Esaki
tabata pa e sine trahá pa Peter Creutzberg pa C.OT. (Curaçao Oil Terminal).
– Kompañamentu di e poesía “E Datu Serku Pretu” di Siegfried “Fiti” Silvanie.
1975 – Konsierto na Centro Pro Arte huntu ku Jac Murphy Trio.
1976 – SJT a partisipá den Carifesta na Jamaica, bou di e nòmber “Curaçao Quintet”.
– Konsierto na Sentro Kultural Kòrsou (CCC) ku Diana Lebacs, den kua
a estrená “Balada di Buchi Fil” (komposishon di SJT riba e obra di Pierre
Lauffer) pa di prome bia.
– Konsierto di “Curaçao Quintet” ku koperashon di Ced Ride, kantante;
Rudy Cijntje, saksofon; Jacobo Colina, tròmpèt.
– Aktuashon na Tele Curaçao ku Roy Louis, kitara; Elmer Louis, konga.
– Konsierto di Pasku ku Ced Ride i koperashon di: Rina Penso, Fides Elmzoom
Henry Moen i Roque Regalado.
1977 – Edsel Clarinda (Joe Bataan) a kuminsá ensayá i toka ku SJT.
– Muzik pa sine di Wilbert Tecla “
1978 – Koperashon ku e proyekto di De Tempel, “Images of Curaçao”, den kua Angel i Etzel a traha huntu ku Harold Wheeler (Kompositor/Areglista den entre otro e sine “Close Encounters of the third kind”).
– Preludio musikal riba “The Dumb Waiter”, un “eenacter” bou di direkshon di defuntuHerman Broesterhuizen na Centro Pro Arte. Den e preludio aki SJT
a presentá komo kuarteto, ku Eugène Boereveen na konga.
– APOTHEOSE ta un obra teatral total ku: Drama, Muzik i Moveshon, tresé
pa hobennan di Peter Stuyvesant College, Radulphus College i Akademia
Pedagógiko. E kordinashon di muzik tabata den man di Angel i Etzel, i Angel a dirigí e totalidat.
1979 – SJT a kompañá Ramses Shaffy i Nydia Ecury den nan presentashon den
De Tempel.
1980 – SJT a kompañá henter e “Magic Show” di Prof. Telemac i Tom Presti ku
komposishonnan di Angel i Etzel. E bia aki a inkorporá músikonan hoben,
entre otro: Ivan Kowsoleea, Tony Scheer, Daniel Salsbach, Lennart Salsbach,
Rudy Mathilda i Bibi Provence.
– SJT a kompaña Nydia Ecury den su One Woman Show “Luna di Papel”.
1981 – SJT a trese e parti musikal ku propio komposishonnan den “Reflekshon 1981”
pa Tele Curaçao.
– Den un produkshon di Corrie van Heyningen pa televishon, SJT a traha muzik
pa e diferente partinan.
1982 – SJT a trese un konsierto pa sera e Aña Akadémiko di U.N.A. ku entre otro
kanto di Bibi Provence.
– SJT a partisipá na “Smafestac” (Sint Maarten Festival of Arts & Culture)

1983 – Konsierto ku Bibi den De Tempel.
– Konsiertu den ouditorio di CCC ku defuntu Vivian Frans komo kantante.

1984 – Konsierto ku splikashon na Ascencion pa “Credit Union San Pedro” ku
Rina Penso komo kantante.
– Konsierto na Fort Waakzaamheid ku Rina Penso komo kantante.
1985 – Muzik pa e sine di Containerhaven “It’s our heart”, trahá pa e sinematógrafo
Anthony Douglas.
Si bo ke sigui tur e detayenan pa “Wine and Art” yama I registra tempran! 682-1719 of 690-9433. Tin mas yama pa bo sa!!!

….Arte i Jazz un kombinashon úniko ku bo no por pèrdè….

…Salsbach Jazz Trio den nan tempu di gloria i awe kla pa entretené tur edat…

…Kòrsou su ambiente outéntiko di Jazz a start ku SJT..(Salsbach Jazz Trio)