PIN mas ku nunka tras dje plan ekspanshon supsidio di hür Sifranan CBS ta indika un nesesidat grandi di bibienda

PIN mas ku nunka tras dje plan ekspanshon supsidio di hür Sifranan CBS ta indika un nesesidat grandi di bibienda

Willemstad — Den un komunikado di dia 30 di mei, CBS ta indika un nesesidat di 16 mil kas na Korsou. Ya prome ku esei, ku paragrafo 3.7 di e akuerdo di gobernashon di Kabinete Ruggenaath, e koalishon di PIN, PAR i MAN a anunsia di lo start e trayekto pa, despues di investigashon nesesario, ekspande e sistema di subsidio di hür pa kasnan partikular tambe, esta kasnan ku no ta di FKP. Asina e koalishon aktual ta duna ekstra sosten na e nesesidat basiko di 16 mil famia.

Datos
Si na 2008 CBS a bisa ku falta 10 mil kas, awe den 2017 tin 16 mil famia ku ta enbuska di un kas. E motibunan prinsipal dikon e nesesidat di bibienda a krese asina tantu ta e ekspanshon di poblashon ku 10% i e deseo di mas i mas suidadano pa bai biba riba su mes. Sinembargo, segun CBS na mes momentu tin kasi 9 mil bibienda pará bashi, di kual kasi 2 mil nunka a keda habita.
E dato ei ta pone Partido PIN yega hopi lihe na e konklushon ku un gran parti di e 16 mil famianan ku ta buska un otro kas of un kas propio, no ta den posishon pa kubri e gastunan di esei nan mes. Por ehempel, for di un enkuesta preliminar, PIN a kalkula ku di kada 2 famia ku ta hür, 1 ta paga un suma ku ta fors’e hopi.
E famianan ei merese sosten. Sigur si ta trata di un famia di un mayor soltero ku yunan menor di edat.

Programa di gobernashon
Durante e ultimo kampaña, Partido PIN i su eksponente Kenneth Martis a lansa e idea pa ekspande e sistema di subsidio di hür pa kasnan partikular tambe. Asta ta asina ku segun PIN e sistema ekspande, por parte ta paga su mes.
Pesei pa medio di esaki publikamente Partido PIN ta anima e ministernan konserni, sr. Koeiman i sr. Gijsbertha, pa durante e fase aki di redakshon di e programa di gobernashon, sigi duna hopi atenshon na ehekushon responsabel dje inisiativa sosial aki. Mas sosten e famia haña, mas e por aporta na e potenshal di nos isla.
Naturalmente PIN ta anima CBS tambe pa sigi hasi su esfuerso pa produsi e datosnan indispensabel pa un gobernashon responsabel.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: